Бисмиллаҳир роҳМАНир роҳийм қуйида Закот чиқариш қўлланмаси сифатида келтирилган савол-жавоблар шайх Муҳаммад Содиқ

---

t.me/Savollar_kanal
БИСМИЛЛАҲИР РОҲМАНИР РОҲИЙМ
Қуйида Закот чиқариш қўлланмаси сифатида
келтирилган савол-жавоблар шайх Муҳаммад Содиқ
раҳимаҳуллонинг
«Мўминнинг
нажоти»
китобларидан олинган.
УШБУ МАВЗУГА ОИД САВОЛ-ЖАВОБЛАР
Савол: Ака-ука биргаликда тижорат қилишса,
закотларини қай тарзда адо қиладилар?
Жавоб: Аввало шуни билиб олиш керакки, кимнинг
моли қанча экани, ака-укаларнинг тижоратдаги ўринлари
маълум бўлиши керак. Масалан, ака-ука тижоратда бир-
бирига мулки ва фойдаси тайин бўлган шерикми ёки мулк
бирига тегишли бўлиб, бошқаси унинг ишчисими? Чунки
закот ҳар бир кишининг ўз молидан адо қилиниши
шартдир. Шу нарсалар маълум бўлганидан кейин
кимнинг моли нисобга етса, закот бериш ўша кишининг
зиммасига вожиб бўлади.
Савол: Эр-хотин биргаликда тижорат қилишса,
закотларини қандай адо қиладилар?
Жавоб: Аввало, эр-хотиннинг мулки аниқ тайин
қилинган бўлиши лозим. Чунки икковидан бири вафот

---

t.me/Savollar_kanal
этса, тақсим қилинадиган мерос тайин бўлиши керак.
Агар ажратиб, тайин қилиб олинмаган бўлса, ўртадаги
мол икки томонга тақсимланганда ҳар бирига нисоб
миқдорича мол тегса, икковларига ҳам закот вожиб
бўлади. Агар тақсим қилинганда иккаласига теккан улуш
белгиланган закот нисобига етмаса, у ҳолда закот
бермайдилар.
Савол: Тижорат мақсадида нарса сотиб олиб,
кейинчалик бу фикридан қайтса, бундай ҳолатда у
нарсадан закот бериладими? Масалан, бир киши тижорат
мақсадида улов сотиб олди. Лекин кейинчалик фикридан
қайтиб, уни ўзи минса, унга закот вожиб бўладими?
Жавоб: Бундай ҳолатда то уни сотмагунича уни закот
молига қўшмайди. Лекин уловни сотмоқчи бўлиб олиб,
сотилгунича ундан ўз эҳтиёжларида фойдаланиб турса,
ундан закот вожиб бўлади. Масалан, бир киши уловни
тижорат мақсадида сотиб олди. Сўнгра сотиш ниятидан
қайтиб, ундан фойдаланишни ният қилди. Эгаси уловдан
фойдаланишни ният қилар экан, у энди тижорат моли
ҳисобланмайди. Кейинчалик уни сотмоқчи бўлса, закот
вожиб бўладиган молнинг эвазига сотмагунича ундан
закот вожиб бўлмайди.