2-bob. Inspeksiyaning vazifalari va funksiyalari

1. Ushbu Nizom O‘zbekiston Respublikasi Moliya vazirligi huzuridagi Alkogol va tamaki bozorini tartibga solish inspeksiyasining (keyingi o‘rinlarda Inspeksiya deb ataladi) maqomi, asosiy vazifalari, funksiyalari, huquqlari, javobgarligi, faoliyatini tashkil etish va hisobot berish tartibini, shuningdek, rahbarlarining funksional vazifalari va javobgarligini belgilaydi.

2. Inspeksiya iste’mol va texnik etil spirti, alkogol va tamaki mahsulotlarini ishlab chiqarish va aylanmasi sohasida yagona davlat siyosatini amalga oshiradigan davlat boshqaruvi organi hisoblanadi va o‘z faoliyatida O‘zbekiston Respublikasi Moliya vazirligiga (keyingi o‘rinlarda Moliya vazirligi deb ataladi) hisobot beradi.

3. Inspeksiya o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlis palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, boshqa qonun hujjatlariga, shuningdek, ushbu Nizomga amal qiladi.

4. Inspeksiya yuridik shaxs hisoblanadi, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhr va blankalarga, mustaqil balansga, shaxsiy g‘azna hisobvaraqlariga va xorijiy valyutadagi hisobraqamlariga egadir.

5. Inspeksiyaning rasmiy nomi:

a) davlat tilida — O‘zbekiston Respublikasi Moliya vazirligi huzuridagi Alkogol va tamaki bozorini tartibga solish inspeksiyasi;

b) ingliz tilida — The Inspection of the regulation of alcohol and tobacco market under the Ministry of finance of the Republic of Uzbekistan;

v) rus tilida — Inspeksiya po regulirovaniyu alkogolnogo i tabachnogo rinka pri Ministerstve finansov Respubliki Uzbekistan.

6. Inspeksiyaning joylashgan joyi (pochta manzili): 100011, Toshkent shahri, Shayxontohur tumani, Abay ko‘chasi, 6.