1-ma’ruza temir yo‘l transporti asoslarining asosiy mazmuni reja

1-MA’RUZA
TEMIR YO‘L TRANSPORTI ASOSLARINING
ASOSIY MAZMUNI
Reja:
1. Temir yo‘llar umumiy kursi fanini o‘rganishdan maqsad va vazifalar.
2. Transport turlari, ularning xususiyatlari, transport tizimida tutgan o‘rni va tashish jarayonidagi hamkorligi.
Tayanch so‘z va iboralar: transport turlari xususiyatlari va tasnifi, texnik imkoniyatlar, transportining o‘rni, mavqei, tashkiliy imkoniyatlari, inshootlar va harakat tizimi, vagon aylanmasi, yo‘lovchi aylanmasi.
1. Temir yo‘llar umumiy kursi fanini o‘rganishdan maqsad va vazifalar.

Transportning xalq xo‘jaligida tutgan o‘rni beqiyos katta. Temir yo‘l transporti muhandislari institutini bitiruvchilar «Temir yo‘l transporti» haqida yetarlicha nazariy bilim va amaliyot ko‘nikmalariga ega bo‘lishlari, transport turlari xususiyatlari va tasnifi, ularning uzviy bog‘liqligi va o‘zaro hamkorlikda ishlashini aniq idrok qila bilishlari kerak.
Shu nuqtai nazardan ushbu fanni o‘qitishdan maqsad talabalarda transport haqida bir butun tasavvur hosil qilish, uning texnik imkoniyatlari va ularni ishlatish, inshootlar va harakat tizimi, tashish jarayonini tashkil qilish haqida bilimga ega bo‘lishlarini ta’minlashdan iborat.
Talabalarga yagona transport tizimi haqida va unda temir yo‘l transportining o‘rni, mavqei haqida, temir yo‘l transportining aniq ishlaydigan, tashkiliy imkoniyatlari, katta transport sohasi ekanligi haqida ma’lumot berish ushbu fanning maqsadlaridan biridir.
«Temir yo‘llar umumiy kursi» fani «Transport vositalaridan foydalanish va ta’mirlash», «Avtomatlashtirish va boshqaruv», «Telekommunikatsiya», «Tortish vositalari», «qurilish», «Iqtisodiyot», «Menedjment», «Buxgalteriya hisobi va audit» yo‘nalishlari uchun mo‘ljallangan.
Fanni o‘qitish jarayonida transportning mustaqil Respublikamizning o‘zi belgilagan yo‘ldan rivojlanishida tutgan o‘rni, bozor iqtisodiyotiga o‘tish davrida ishlash xususiyatlariga va kelajak taraqqiyot yo‘nalishlariga e’tibor qaratiladi. Iqtisod sohasi talabalarini o‘qitishda temir yo‘l transportining har bir soha va bo‘lim, hamda ishlash texnologiyasiga alohida o‘rin ajratiladi.