1-БЎлим. Бахтли ҳаёт асослари бахтнинг баҳоси қанча?

---

Бахтли ҳаѐт 
сари 
Нашрга тайѐрловчи: Зиѐвуддин Раҳим 

---

2 
1-БЎЛИМ. БАХТЛИ ҲАЁТ АСОСЛАРИ 
БАХТНИНГ БАҲОСИ ҚАНЧА? 
Ҳар ким бахтни турлича талқин қилади. Кимдир: “Чўнтагингда пулинг, ѐнингда ошна-
оғайниларинг бўлса, ғам-ташвиш чекмай мазза қилиб яшайсан”, дейиши мумкин. Бироқ, бошга тушган 
ҳар қандай муаммони пул билан, таниш-билиш билан ҳал этиб бўлмаслиги кундай равшан. 
Бойлик, ҳашаматли уй-жойга эга бўлиш, таниш-билиш орттириш, одамлар ҳурматини қозониш – 
кўпчиликнинг орзуси. Шуларга эришдингиз ҳам дейлик. Аммо мол-давлат, обрў-эътибор билан 
бахтни сотиб олса бўладими? Сиҳҳат-саломатликни ѐки тинчлик-хотиржамликни-чи? Чўнтагингиздан 
пул чиқариб, хоҳлаган вақтингизда истаганча сотиб олиш иложи борми бундай неъматларни? 
Бахтнинг бозори қаерда? Қайси дўконда хотиржамлик неъмати сотилади? Унинг баҳоси қанча? 
Дунѐда шундай нарсалар бор, уларни пулга сотиб олиб бўлмайди. Тинчлик-хотиржамлик, 
саломатлик, осойишталик мана шундай неъматлар сирасига киради. Баҳоси йўқ мазкур неъматларни 
бировга пул бериб, ялиниб-ѐлвориб ҳам тополмайсиз. Уларни бизга Яратган Зот беради. 
Бахт-саодат асоси – имон-эътиқод, меҳр-оқибат, садоқат, қалб поклиги, тинчлик-хотиржамлик, 
соғлик-саломатлик. Лекин ҳаммаям бахтни шулар билан ўлчайвермайди. Кимдир бойликни, яна 
кимдир обрў-эътиборни, дабдабали ҳаѐтни, шоҳона турмуш тарзини бахт деб билади. Аммо, ўша 
бадавлат одамлар ичида ўзини бахтсиз ҳис қиладиганлар етарлича топилишини ўйлаб ҳам кўрмайди. 
Ишлари жойида бўлсаям, баъзида одам негадир ўзини бахтсиз ҳис қилади, ҳаѐтидан ҳеч кўнгли 
тўлмайди. Чунки кўнгилда дард бўлса, инсон тўкис бахтли бўлолмайди. Бахт-саодатга эришишда 
маънавий-руҳий омиллар ўрни катта. 
Қўлингиздаги китобда бахтли бўлиш сирлари, қалб хотиржамлиги, оилавий тотувлик, соғлиқни 
сақлаш ҳақида тўхталиб ўтилади. Сиз азизлар билан ҳаѐт моҳияти, бахт-саодат мезонлари, соғлом 
турмуш тарзи ҳақида яқиндан суҳбатлашиш ниятидамиз.