Зиёвуддин Раҳим Дилдаги гаплар СЎзбоши

ЖАМИЯТДАГИ БУЗИЛИШ 
Одамнинг табиати бузилса, имон-эътиқоди заифлашса ёки умуман бўлмаса, уят ишларни 
меъёрий (нормал) ҳолат деб билади. Бу тушунча жамиятда фасод тарқалишини тезлатади, маънавий-
руҳий ҳаётни издан чиқаради. 
ОЛИМ БИЛАН ЖОҲИЛНИНГ ФАРҚИ 
Олим жоҳилдан асосан одоби билан ажралиб туради. Илмли одамнинг хулқи ёмон бўлса, 
жоҳилга ўхшаб қолади. 
ТАҚВОДОРНИНГ БЕЛГИСИ 
Ўзингизни қанча художўй ҳисобламанг, сизнинг нақадар тақводорлигингиз одамлар билан 
муомалада: пул олди-бердисида, ваъдага вафода, омонатга қай даражада вафо қилишингизда билинади. 
ПУЛГА СОТИБ ОЛИНГАН ШАРМАНДАЛИК 
Ямоқ кийим кийиш уят эмас, муҳими либос тоза, авратни ёпадиган бўлсин. Айримлар 
қимматбаҳо кийим кийса-да, либоси очиб юриш уят саналадиган жойларини ёпмайди. Улар, аслида, 
фалон пулга шармандаликни сотиб оладилар. 
МАҚТАНЧОҚЛИК ИЛЛАТИ 
Бир одам неъматга эришганида уни ҳаммага айтиб мақтаниши тўғри эмас. Агар мақтанчоқлиги 
туфайли ўша неъматдан айрилиб қолса, фақат ўзини маломат қилсин. 
ВАЗИЯТ ҚАЧОН ИЗДАН ЧИҚАДИ? 
Гапга қулоқ солиб, амал қилувчилардан насиҳатгўйлар кўп бўлса, иш бажарувчилардан буйруқ 
берувчилар сони ортиб кетса, вазият издан чиқади. 
ТОВУСГА ЎХШАГАН АЁЛЛАР 

---

Айрим аёллар товусга ўхшайди. Товус патларини ёйиб, чиройини ҳаммага намо­йиш қилади. Ўз 
ҳуснига маҳлиё бўлиб, назоратни қўлдан чиқаради. Натижада орқаси очилиб кетганини билмай қолади. 
Чиройини ҳар кимга кўз-кўз қилиш оқибати шармандалик билан тугайди. Аёлнинг ҳурмати ҳаё-
ибода. Иффатини сақлаган обрўйини сақлайди. 
МАҚТОВГА ЎРГАНИБ ҚОЛИШ ХАВФИ 
Одам ўз нафсини тергаб турмаса, мақтов эшитишга ўрганиб қолади. 
НАҚАДАР БАХТЛИСИЗ! 
Сиз нақадар бахтли инсонсиз: ҳасад ва ғийбат қилишга умуман вақтингиз йўқ. Доим фойдали 
ишлар билан бандсиз. 
ДУОГЎЙ ХАЛҚ 
Бир жойга йиғилсак, “Тинчлик-омонлик бўлсин!” деб дуо қиламиз. Таом еб бўлгач, дастурхон 
йиғиштирилишидан олдин “Берган неъматларингга шукр!” дея дуога қўл очамиз. Тўйимиз ҳам, 
маъракамиз ҳам дуосиз ўтмайди. Биз дуогўй халқмиз. Ҳар қандай ҳолатда фақат Ўзига 
юкинадиганлардан қилгани учун минг шукр!