Зиёвуддин Раҳим Дилдаги гаплар СЎзбоши

УСТОЗИМ ЎГИТЛАРИ 
Менга араб тилидан илк сабоқ берган устозим Исмоил домла Охунов (Аллоҳ у кишини раҳматига 
олсин!) бир неча марта қуйидаги насиҳатларни қилганлар: 
1. Фақат олимлар учун китоб ёзма. Чунки хос мавзуларни, қийин жумлаларни оддий одамлар 
тушунмайди. Агар оммабоп усулда ёзсанг, уни омма ҳам, олимлар ҳам ўқийверади. 
2. Куч-қувватинг борида меҳнат қил, бироқ ўзингни чарчатиб қўйма. Жисмоний меҳнат билан 
шуғуллан. Дам олишни ҳам бил, мияга оғирлик тушмасин. Ўзингни эҳтиёт қил. 
3. Қарилар кўп гапиради. Бу эса ёшларга доим ҳам ёқавермайди. Кексалар кўп гапиришига сабаб, 
улар содир этган хатоларни ёшлар такрорламаслигини хоҳлашади. Шунинг учун одам ёши ўтганидан 
кейин насиҳатгўй бўлиб қолар экан. 
3-БЎЛИМ. МУТОЛАА ЗАВҚИ 
ЭНГ ЯХШИ ДЎСТ 
Ҳозир илм олиш учун турли қулай­ликлар бисёр: компьютер, интернет, фейсбук, телеграм, 
твиттер... Лекин ҳеч нарса китобнинг ўрнини боса олмайди. Китоб ўқишнинг завқи бўлакча. Китоб энг 
яхши дўст, зериктирмайдиган ҳамроҳдир. 
КИТОБХОН МАСЪУЛИЯТИ 
Китобни шунчаки ўқиб қўймасдан, у ҳақида фикр юритиш, маълумотларни қайта ишлаш, таҳлил 
қилиш илмни мустаҳкамлайди. Ўқувчи фаол бўлса, муаллиф ўсишга эришади. Чунки, ўқувчи муаллиф 
учун ойна вазифасини ўтайди: унинг ютуқ ва камчиликларини кўрсатиб беради. 
БЕЧОРА КИТОБЛАР 
Китоб сотиб олишга пули бор, лекин мутолаага вақти йўқ одамнинг жавонидаги китоблар 
ғарибдир. 
Йиллар ўтса-да, варақлари яп-янгидек турадиган, қўл тегмаганидан устини чанг босиб ётадиган 
китоблар ҳам ғарибдир. 
ТАФАККУРСИЗ МУТОЛАА 

---

Маълумотни тез-тез ўқиб кетавермасдан, таҳлил қилиш, фикрлаш керак. Зеро, тафаккурсиз кўп 
мутолаадан кўра, кам бўлса ҳам мулоҳаза билан ўқиш фойдалироқ. 
ЎҚИШ ВА УҚИШ 
Сиз неча бет ўқиганингизга эмас, китобдан нима олганингизга қаранг. Шунда мутолаадан 
кўзланган мақсад ҳосил бўлади.