Зиёвуддин Раҳим Дилдаги гаплар СЎзбоши

ЭКОЛОГИЯ НЕГА БУЗИЛМОҚДА? 
Матбуотда: “Экология бузилмоқда. Ат­роф-муҳит ифлосланмоқда”, деб бонг урилади. Бунинг 
асл сабаби нимадалигини биласизми? Бугун инсон руҳияти ифлосланмоқда, қалби кирланмоқда. Бутун 
дунё­даги одамларга маънавий қашшоқлик хуруж қилмоқда. Руҳиятга шикаст етса, теварак-атрофга 

---

зарари тегади. Одамзот қилган гуноҳлари сабабидан сув, ҳаво, тупроқ таркиби бузилади, табиат 
ифлосланади, обод юртлар харобага айланади. 
Демак, атроф-муҳитни тозалашдан олдин қалбимиз кирларини ювишимиз, дилдаги қора 
доғларни кетказишимиз керак. Зеро, қалб пок бўлса, бутун тана, қолаверса, сув, ҳаво, тупроқ тозаланади. 
ТИЛ ВА ҚУЛОҚ 
Инсонга битта тил, иккита қулоқ берилган. Яъни, камроқ гапириб, кўпроқ эшитиш лозим. 
Бундан ташқари суяксиз тил учун ўттиз иккита тиш ҳимоя вазифасини ўтайди. Нафс беҳуда сўзларни 
гапиргиси келаверса, тишни тишга қўйиб сабр қилинади. 
СОДДА РОСТГЎЙ ВА МУҒОМБИР АЛДОҚЧИ 
Ёлғон гапирмайдиган одамни алдаш осон. Чунки у бошқаларни ўзига ўхшаган деб ўйлайди. 
Алдоқчи ҳар кимга ҳам ишонавермайди, кўпчиликка шубҳа билан қарайди. Сабаби у ҳам 
бошқаларни ўзига ўхшаган деб ўйлайди. 
ОҚИЛ ИНСОН ҚАНДАЙ БЎЛАДИ? 
Ақлли инсон ўз ишини билиб қилади, одамлар билан тортишиб ўтирмайди, сан-манга бормайди. 
Гапирган гапираверади. Унинг оғзига сиз хўжайин эмассиз. Ҳаммаси ёзилмоқда. Гувоҳлар етарли. 
Адолатли ҳисоб қиёмат куни қилинади. 
МАЪНАВИЙ ҚУДРАТИМИЗ 
Бизни биз қилиб турган нарса нима? Бу, шубҳасиз, имон-эътиқод, ҳалоллик, ҳаё-иффат, ғайрат-
шижоат, адолат, оила шаънини сақлашга интилиш, каттага ҳурмат, кичикка иззат, меҳр-оқибат ва 
ҳоказо. Агар биз мана шу хислатлардан айрилсак, ўзлигимизни йўқотамиз. 
5-БЎЛИМ. ОИЛАВИЙ ҲАЁТ, ЭР-ХОТИН МУНОСАБАТИ, ФАРЗАНД 
ТАРБИЯСИ 
ҲАҚИҚИЙ БАХТ МЕЗОНИ 
Оқила қиз ўзи учун пардоз-андозни, очиқ-сочиқ кийинишни эмас, имон билан ҳаёни зийнат деб 
билади. 
Ақлли йигит қизнинг “замонавий” либосига, данғиллама иморатига, отасининг қаерда ишлашию 
қанча мол-дунёси борлигига эмас, имонига, ҳаёсига, одоб-ахлоқига эътибор беради.