Зиёвуддин Раҳим 2 бисмиллаҳир роҳМАНир роҳийм!

“Ким чиройли амал қилувчи ҳолида ўзини Аллоҳга топширса, мустаҳкам арқонни ушлабди. 
Барча ишлар охир-оқибатда Аллоҳга боради”
(“Луқмон” сураси, 22-оят).
Ўзини Аллоҳга топшириш Аллоҳнинг айтганини қилиш, қайтарганидан қайтиш, Парвардигорига 
тўлиқ итоат этишдир. 
Яъни, ким холис ният билан Парвардигори амрига итоат этса, шариат ҳукмларига бўйсунса, Аллоҳ 
розилигига олиб борадиган, У Зотнинг чиройли мукофотларига эриштирадиган мустаҳкам арқонни 
ушлабди. Барча одамлар Аллоҳга қайтишади, ҳамма амаллар У Зотга ҳавола этилади. Шунда Аллоҳ ҳар 
кимни амалига қараб ҳисоб-китоб қилади. 
Абдуллоҳ ибн Амр ибн Ос розияллоҳу анҳумодан ривоят қилинишича, Расулуллоҳ соллаллоҳу 
алайҳи ва саллам шундай деганлар: “Сизлардан ҳеч ким токи хоҳиш-истаклари мен олиб келган нарсага 
бўйсунмагунича мўмин бўлмайди” (Бу ривоят “Шарҳус сунна” китобида келтирилган. Нававийга кўра, 
ҳадис санади саҳиҳ).
Пайғамбаримиз алайҳиссалом олиб келган нарса нима? Қуръон ва суннат. Демак, банда Қуръонга, 
суннатга шак-шубҳасиз ишониши билан бир қаторда унга тўлиқ бўйсунмагунича комил имон эгаси бўла 
олмайди. 
Агар инсон ўз нафсига қулоқ солса, Ислом шариатига зид ишларга мойил бўлади. Чунки нафс 
ҳалолми, ҳаромми, демасдан фақат роҳат-фароғатда яшашни хоҳлайди. Кўнгил майли одам боласини 
енгил-елпи, бефойда ишларга бошлайди. Бунинг оқибати бу дунёда ҳам, охиратда ҳам ҳалокатдир. 
Аллоҳнинг дини Ислом одамларга энг тўғри, фойдали йўлни кўрсатади. Исломга бўйсунган: 
Аллоҳга имон келтириб, чин мўмин бўлган киши ҳамма ишларини шариат талабларига мувофиқ 
бажаради. Агар инсон ҳақиқий мўмин бўлса, кўнгли тусаган ишни қилавермайди. Балки “Шу ишим 
Расулуллоҳ олиб келган йўлга, Ислом динига тўғри келадими, йўқми?” деб мулоҳаза юритади, 
билмаганини уламолардан сўраб-суриштиради. Бирор иш нафсига ёқиб турган бўлса-да, Қуръонга, 
Расулуллоҳ соллаллоҳу алайҳи ва саллам суннатларига хилоф бўлса, ундан тийилади. Бирон ишни 
Динимиз буюрган бўлса-ю, аммо кўнглига ёқмай турган, нафсига оғир туюлаётган бўлса ҳам, уни 
бажаришга интилади.