%zbekstan respublikasi a

O`simlik u`lgilerin analizge tayarlaw

Analiz ushın alıng`an o`simlik u`lgisi izertlenetug`ın faktorlardı anıq ko`rsete alatug`ın bolıwı tiyis. Analiz ushın u`lgi az mug`darda alınadı. Biraq analizdin` na`tiyjesi u`lken ko`lemdegi produktsiyag`a durıs sipatlama beriwi kerek. Sonlıqtan analiz ushın u`lgini durıs alıw ku`ta` juwapkerli jumıs.

Da`slepki u`lgi – atızdag`ı eginnin` tu`rine, egis usıllarına, analizdin` wazıypasına baylanıslı, belgilengen mug`darda arnawlı qag`ıydalar tiykarında alınadı.

U`lgi alınatug`ın atızda 2-3 orınnan “maydansha” belgilenedi. Onın` ko`lemi eginnin` tu`rine ha`m basqa da jag`daylarg`a qaray ju`zlegen kvadratlı metrden 0,2-0,5 gektarg`a shekem bolıwı mu`mkin.

Bul maydanshada agrotexnikalıq jumıslar durıs ju`rgizilip, o`simlikler normal rawajlang`an, bir tegis ornalasqan bolıwı tiyis. Izertlewdin` wazıypası o`simliktin` barlıq o`siw da`wirinde azıq zatların o`zlestiriwin anıqlawg`a bag`darlang`an bolsa, u`lgiler o`simliklerdin` barlıq tiykarg`ı rawajlanıw fazalarında alınadı.

G`awasha japıraqlay baslag`anda 200-300 o`simlik alınadı. Onnan keyin rawajlanıw fazalarında ha`r maydanshada 50 o`simlikten 3 orında 150 o`simlik belgilenedi. Ha`r maydanshadag`ı o`simliklerdin` shettegilerine etiketka baylanadı.

G`awasha g`umshalay baslag`an da`wirinde 150 o`simlktin` barlıg`ının` biyikligi o`lshenedi, miywe shaqaları sanaladı ha`m bul ko`rsetkishler ortasha bir o`simlikke esaplanadı. Usı mag`lıwmatqa sa`ykes belgilengen maydanshadan 20 o`simlik alınadı. Gu`llew ha`m go`reklerdin` ashılıwı baslang`an fazalarda belgilengen 150 o`simliktin` biyikligi o`lshenedi, miywe organlarının` sanı esaplanadı ha`m ortasha ko`rsetkish boyınsha 10 o`simlik tan`lap alınadı. O`siw da`wirinin` aqırında analizge ha`r maydanshadan keminde 10 o`simlik alınadı. Ma`kke menen o`simlikleri ushın da usı metodikanı qollanıwg`a boladı.

Jon`ıshqanın` u`lgileri ha`r bir oraqtın` aldınan alınadı. Bunın` ushın razmeri 1x1 m ramka tayarlanadı. Atızda o`simlikler bir tegis o`sken jerlerden 5-10 orıng`a ramka qoyılıp, onın` ishindegi o`simlikler orıp alınadı ha`m analizge tayarlanadı.

Alıng`an ha`r bir u`lgige atızdın` yamasa ta`jiriybenin` atı, eginnin` tu`ri, alıw waqtı, kim alg`anı jazıladı. U`lgi ushın alıng`an o`simlikler da`rha`l bo`limlerge ajiratılıp, paqalları 0,2-0,3 sm shamasında maydalanadı. Ha`r bir u`lgi o`z aldına keptiriledi. Tayarlangan u`lgi u`lken qag`azg`a jayıladı ha`m diagonal boylap 4 bo`lekke ajiratıladı. U`lginin` eki qarama-qarsı bo`lekleri alıp taslanıp qalg`an ekewi aralastırıladı.