Ўзбекистоннинг прагматик фаол ташқи сиёсий ва иқтисодий дипломатияси

Иқтисодий дипломатия
Иқтисодий дипломатия – давлат ташқи сиёсатининг элементларидан бири, давлатнинг иқтисодий манфаатларини халқаро даражада ҳимоя қилишга қаратилган ўзига хос дипломатик фаолият. Аниқроқ таърифга кўра, иқтисодий дипломатия – бу анъанавий ва замонавий дипломатия воситаларидан фойдаланган ҳолда, халқаро майдонда миллий иқтисодий манфаатларни ҳимоя қилиш учун давлат, жамоат ва ишбилармон доираларнинг биргаликдаги фаолияти.
Иқтисодий дипломатия – жаҳон иқтисодий майдонида миллий иқтисодий манфаатларни рўёбга чиқаришга ва иқтисодий хавфсизликни дипломатик усуллар билан ҳимоя қилишга қаратилган фаолият. Иқтисодий дипломатиянинг асосий мақсади мамлакатнинг иқтисодий ривожланиши ва халқаро майдонда унинг рақобатбардошлигини оширишдир.
Ўзбекистон иқтисодий дипломатияси ҳам ўзига хос кўринишга эга ва у айниқса, сўнгги йилларда изчиллик билан ривожланиб бормоқда. Ўзбекистоннинг Жаҳон Савдо Ташкилотига аъзо бўлиши учун узоқ вақтдан бери давом этаётган саъй-ҳаракатлари ва унга боғлиқ режаларида ҳам иқтисодий дипломатия асосий ўринни эгаллайди.
Шунингдек, жорий йил 31 августдан 4 сентябргача ўтказилган Ислом тараққиёт банки гуруҳи йиллик анжуманининг айнан Тошкентда ўтказилиши ҳам Ўзбекистон олиб бораётган изчил иқтисодий дипломатиянинг натижасидир. Иқтисодиётнинг стратегик тармоқларида йирик инфратузилма ва ижтимоий аҳамиятга эга лойиҳаларни молиялаштирувчи йирик банк ҳисобланмиш Ислом тараққиёт банкининг йирик тадбирлар ва лойиҳаларда Ўзбекистонга ишонч билдириши ўта муҳим аҳамият касб этади.
Ўзбекистон Президенти Шавкат Мирзиёевнинг жорий йил 15-16 июль кунлари Тошкентда бўлиб ўтган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференцияда минтақалар ўртасидаги муносабатларда савдо-иқтисодий алоқаларни ривожлантириш ва ўзаро сармояларни кўпайтиришни устувор вазифа деб атагани ҳам эътиборга моликдир. Учрашувда Шавкат Мирзиёев икки минтақа давлатлари ўртасида инвестициявий ҳамкорлик ва кооперацияни чуқурлаштириш, иқтисодий алоқаларни кенгайтириш бўйича йиллик минтақалараро форум ташкил қилишни таклиф этиши Ўзбекистон иқтисодий дипломатиясини келгусида бу йўналишда ҳам жадал ишлашини англатади.

Тошкент давлат шарқшунослик университети
«Шарқшунос таҳлилчилар» интеллектуал клуби