Ўзбекистон Республикасининг «Ҳуқуқбузарликлар профилактикаси тўғрисида»

Виктимлик даражаси паст бўлган шахслар - жисмонан бақувват, воқеликка тўғри ёндашувчи ва бошқалар.
Виктимлик даражаси ўртача бўлган шахслар: нейтрал шахслар, яъни ўзи низоли ҳолатни келтириб чиқармайдиган, лекин ноҳақликка чидай олмайдиган шахслар.
Виктимлик даражаси юқори бўлган шахслар: объектив омилларга кўра: маънавий ва жисмоний жиҳатдан ожизлар, аёллар, қариялар, ёш болалар, ногиронлар, пассив характерга эга бўлганлар (қўрқоқлар, журъатсизлар);
субъектив омилларга кўра: ишонувчилар, беэътиборлар, мақтанчоқлар (бойлигини, ўзини кўз-кўз қилувчилар), урушқоқлар.
Жисмоний шахсларнинг ҳуқуқбузарликдан жабрланувчига айланиши хавфини камайтиришда аввало, виктимлик даражаси юқори бўлган шахсларга эътибор қаратилади.
7. Ҳуқуқбузарликлар профилактикасини бевосита амалга оширувчи ва унда иштирок этувчи органлар ҳамда муассасалар фаолиятининг ўзаро ҳамкорлиги амалдаги қонун ва бошқа норматив-ҳуқуқий ҳужжатлар, давлат ва ҳудудий дастурлар, қўшма қарор, қўшма буйруқ, қўшма режа ёки дастурлар билан таъминланади ва уларнинг фаолияти мувофиқлаштирилади. Бу борада ушбу қонуннинг 20-моддасига берилган шарҳда прокуратура органлари ҳузурида тузиладиган мувофиқлаштирувчи кенгашнинг роли ёритилган.


5-модда. Ҳуқуқбузарликлар профилактикасининг асосий принциплари
Ҳуқуқбузарликлар профилактикасининг асосий принциплари қуйидагилардан иборат:
қонунийлик;
инсонпарварлик;
тизимлилик;
ишонтириш усулининг устуворлиги;
таъсир кўрсатиш чора-тадбирларини фарқлаш ва якка тартибдаги ёндашиш.

Ш А Р Ҳ

Ҳуқуқбузарликлар профилактикасининг асосий принциплари дейилганда ҳуқуқбузарликлар профилактикасини амалга оширишда риоя этилиши лозим бўлган устувор қоидалар тушунилади.