Ўзбекистон Республикасининг «Ҳуқуқбузарликлар профилактикаси тўғрисида»

Қонунийлик принципи ҳуқуқбузарликлар профилактикасини амалга оширувчи ва унда иштирок этувчи органлар ҳамда муассасалар томонидан ҳуқуқбузарликлар профилактикасини амалга оширишда Конституция ва қонунларга қатъий амал қилинишини англатади.
Инсонпарварлик принципи. Ҳуқуқбузарликлар профилактикасида инсонпарварлик принципининг моҳияти шундаки, ҳуқуқбузарликлар профилактикасида профилактик чора-тадбирлар тизимини ишлаб чиқиш ва амалга оширишда одамларга руҳан ва жисмонан тазйиқ ўтказишга, шахсга нисбатан шафқатсиз муносабатда бўлишга мутлақо йўл қўйилмайди ва бу давлат томонидан кафолатланади, акс ҳолда бундай қилмиш жавобгарликка сазовор бўлади.
Тизимлилик принципи. Тизим воқеа, ҳодиса, муносабат ва нарсаларнинг ўзаро боғлиқ бўлган ички бирлигидир. Ҳуқуқбузарликлар профилактикасининг тизимлилик принципи бу борадаги чора-тадбирларнинг аниқ ва ўзаро боғланган тартибда амалга оширилишини англатади.
Ишонтириш усулининг устуворлиги принципи. Ишонтириш усулининг моҳияти шундаки, ушбу усул, аввало, тарбивий-профилактик таъсирга эга бўлиб шахсда ҳуқуқбузарлик содир этилишининг олдини олишга қаратилган маънавий ва ахлоқий ҳамда ҳуқуқий қадрятларга ишонч уйғотади. Шу билан бирга ишонтириш усули камхаражатлилиги, кенг кўламда амалга ошириш имкониятига эгалиги, барвақт профилактик характерга эгалиги билан ҳам аҳамиятли ҳисобланади.
Ишонтириш усулининг устуворлиги дейилганда, ҳуқуқбузарликлар профилактикасини амалга оширишда, аввало, мазкур усулга таяниш тушунилади.
Таъсир кўрсатиш чора-тадбирларини фарқлаш ва якка тартибдаги ёндашиш. Ҳуқуқбузарликлар профилактикасини бевосита амалга оширувчи органлар ва муассасалар ҳуқуқбузарликлар профилактикасини амалга оширишда махсус таъсир кўрсатиш чораларини қўллаш ваколатига эга бўлиб, мазкур таъсир кўрсатиш чоралари ҳар бир шахснинг маънавий ва руҳий олами, маълумоти, ёши, соғлиғи, илгари ҳуқуқбузарлик содир этган ёки этмаганлиги, содир этган ҳуқуқбузарлиги кабиларни инобатга олган ҳолда ҳар бир шахс учун индивидуал ёндашув асосида қўлланилади.