Ўзбекистон Республикасини янада ривожлантириш бўйича Ҳаракатлар стратегияси тўғрисида

Низонинг моҳияти
“А” масъулияти чекланган жамияти (бундан буён матнда – даъвогар деб юритилади) ва “Б” масъулияти чекланган жамияти (бундан буён матнда – жавобгар деб юритилади) ўртасида маҳсулот етказиб бериш шартномаси тузилган.
Шартнома шартларига кўра, даъвогар жавобгарга умумий қиймати 500 000 000 сўм бўлган эҳтиёт қисмлар ва қурилиш молларини етказиб бериши, жавобгар эса маҳсулот ҳақини тўлаши лозим бўлган.
Шартнома шартларига кўра, даъвогар тегишли ҳисоб варақ-фактура ва ишончномалар асосида жами 480 373 400 сўмлик эҳтиёт қисмлар ва қурилиш молларини жавобгарга етказиб берган. Жавобгар эса етказиб берилган маҳсулотлар бўйича жами 125 000 000 сўмлик тўловларни амалга ошириб, қолган 355 373 400 сўмини тўлаб бермаган.
Даъвогарнинг юборган талабномасида кўрсатилган сумма жавобгар томонидан ихтиёрий равишда тўлаб берилмаган.
Шу сабабли даъвогар судга даъво аризаси билан мурожаат қилиб, жавобгардан 355 373 400 сўм асосий қарз, 53 305 950 сўм жарима ва 49 032 720 сўм пеня ундиришни сўраган.


Даъвогарнинг важлари
Тарафлар ўртасида маҳсулот етказиб бериш шартномаси тузилган. Шартнома шартларига кўра, даъвогар умумий қиймати 500 000 000 сўм бўлган эҳтиёт қисмлар ва қурилиш молларини етказиб бериши, жавобгар эса маҳсулот ҳақини тўлаши лозим бўлган.
Даъвогар шартнома шартларида кўрсатилган маҳсулотларни жавобгарга етказиб берган бўлса-да, жавобгар унинг ҳақини тўлиқ тўлаб бермаган. Шу асосда даъвогар томонидан жавобгарга ушбу суммани ихтиёрий равишда тўлаб бериш тўғрисида талабнома юборилган.
Даъвогар томонидан юборилган талабномани жавобгар оқибатсиз қолдирганлиги сабабли жавобгардан 355 373 400 сўм асосий қарз, 53 305 950 сўм жарима ва 49 032 720 сўм пеня ундириш лозим бўлади, деб ҳисоблаган.


Жавобгарнинг важлари
Тарафлар ўртасида маҳсулот етказиб бериш шартномаси шартларига кўра, даъвогардан тегишли маҳсулотлар қабул қилиб олинганлигини, улар бўйича тўловлар босқичма-босқич тўлаб борилаётганлигини, қолган қисмини ҳам тез кунларда тўлаб берилишини таъкидлаган.
Шу сабабли даъво аризасида кўрсатилган жарима ва пеня ундириш ҳақидаги талабларни қаноатлантиришни рад этиш лозим, деб ҳисоблаган.