Ўзбекистон республикаси президенти ҳузуридаги давлат бошқаруви академияси янги ўзбекистон – янгича дунёқараш

5.2 Cамарали ташқи сиёсат йўналишидаги янги вазифалар

Ўзбекистон Республикаси Президентининг Мурожаатномасида ташқи сиёсат масалаларига ҳам анъанавий тарзда алоҳида эътибор қаратилди. Маълумки, Ўзбекистоннинг сўнгги йилларда олиб борган ташқи сиёсати нафақат миллий хавфсизлигимиз, балки минтақавий хавфсизлик ва барқарор тараққиётга муҳим замин яратди.

Давлатимиз олиб бораётган очиқ, прагматик ва амалий ташқи сиёсатни инобатга олиб ҳамда узоқ муддатли стратегик мақсадларимиздан келиб чиққан ҳолда, Ўзбекистон Республикасининг Ташқи сиёсий фаолият концепцияси такомиллаштирилади.
Шавкат МИРЗИЁЕВ

Мудофаа ва жамоат хавфсизлиги масалалари. Ўзбекистон раҳбари дунёнинг турли минтақаларида кечаётган минтақавий можаролар ва тўқнашувлар ҳақида гапирар экан, айнан мана шу мураккабликлар тинчлик ва хавфсизлик соҳасида пухта ўйланган сиёсат юритиш, бу борадаги ишларни янада жадаллаштиришни тақозо этишига урғу берди. Ўзбекистон нафақат Марказий Осиё, балки МДҲ ҳудудидаги кучли мудофаа қобилиятига эга мамлакатлар сирасига киради.
Мудофаа қобилиятини мустаҳкамлаш борасида:

• 
  қўшинларнинг профессионал ва жисмоний салоҳиятини юксалтириш;
  
• 
  ҳарбий хизматчилар ва уларнинг оилаларини ижтимоий қўллаб-қувватлаш;
  
• 
  ёшларимизни ватанпарварлик руҳида тарбиялаш назарда тутилмоқда.
  

Хавфсизлик ва тинчлик борасида навбатдаги таъкидланган масала – бу маҳаллада жамоат хавфсизлигини таъминлашга қаратилди. Бу ерда ҳуқуқ-тартибот идоралари олдига янгидан янги вазифалар белгиланиб, уларни аҳоли осойишталигининг чинакам посбонларига айлантириш йўлида янги дастурлар амалга оширилиши белгиланди.
2020 йилда Сардоба ва Бухорода бўлиб ўтган икки табиий офат давлат идоралари ва жамият олдига муҳим вазифаларни қўйди. Бу икки офат мамлакатда илгари кузатилмаган инқирозли ҳолатни юзага келтирди. Бундай табиий ва техноген офатларнинг олдини олиш мақсадида бу борадаги мавжуд тизимни янада такомиллаштириш тақозо этилмоқда. Мурожаатномада эса янги тизимдаги ёнғин хавфсизлиги, соҳанинг моддий-техник базаси ва кадрлар салоҳиятини тубдан мустаҳкамлашга қаратилган вазифалар таклиф этилди. Бу борадаги энг муҳим таклифлардан бири – “Фавқулоддаги ҳолат тўғрисида”ги Қонун лойиҳаси ҳамда қайд этилган муаммолар ечимига қаратилган Ҳукумат дастурини ишлаб чиқиш топшириғи берилди.