Ўзбекистон республикаси президенти ҳузуридаги давлат бошқаруви академияси янги ўзбекистон – янгича дунёқараш

Марказий Осиёнинг устуворлиги
Ўзбекистон ташқи сиёсатида Марказий Осиё устуворликни сақлаб қолади. Бунинг асосий сабаби Ўзбекистоннинг ҳаётий муҳим манфаатлари шу минтақа билан боғлиқ эканлигига бориб тақалади. Марказий Осиё ўзининг муҳим геосиёсий жойлашуви ва улкан минерал-хом ашё ресурслари захираларига эгалиги туфайли жаҳон миқёсида кучли эътибор объекти бўлиб, йирик давлатларнинг стратегик манфаатлари туташадиган ҳудуддир.

Ташқи сиёсатимизнинг устувор йўналиши бўлган Марказий Осиё давлатлари билан кўп асрлик дўстлик ва яхши қўшничилик, стратегик шериклик ва ўзаро ишонч руҳидаги алоқаларимизни янада мустаҳкамлашга алоҳида эътибор қаратамиз.
Шавкат МИРЗИЁЕВ

Минтақада трансчегаравий дарёлар сув ресурсларидан оқилона фойдаланиш масаласи, миллионлаб кишиларнинг соғлигига, аҳоли генофондига оғир зиён етказаётган Орол денгизи қуришининг ҳалокатли оқибатлари Марказий Осиё давлатлари ҳамкорлигини талаб этади.
Минтақанинг очиқ денгиз портларига чиқишига имкон берувчи транспорт-коммуникация йўлларини барпо этиш зарурати ҳам ўзаро бирдамлик талаб этади. Сўнгги йилларда ўзаро савдо айирбошлаш ҳажми жадал ўсиб бораётган Ўзбекистонда ўз қўшниларига нисбатан прагматик ва шу билан бирга очиқ ҳамда яхши қўшничилик, дўстлик ва хайрихоҳлик принципларига асосланган сиёсат олиб борилмоқда. Ўзбекистон минтақадаги барча долзарб масалаларни ўзаро манфаатдорлик, бир-бирининг ички ишларига аралашмаслик принципларига асосланган ҳолда, музокаралар йўли билан халқаро ҳуқуқ нормаларига мос равишда ҳал этиш тарафдори эканлигини сақлаб қолади. Марказий Осиё муаммолари ташқи кучларнинг аралашувисиз минтақадаги давлатларнинг ўзлари томонидан ечилаётгани ўзаро ишонч руҳини мустаҳкамламоқда.
Пандемия даврида Марказий Осиё республикалари жиддий ҳамкорликни йўлга қўйган ҳолда, минтақавий жипсликнинг нақадар зарурлигига амин бўлишди. Айнан шу туфайли Мурожаатномада давлатимиз раҳбари томонидан минтақавий ҳамкорликни ривожлантиришни назарда тутувчи бир нечта ташаббус илгари сурилди:
5.2.-расм. Мурожаатномада давлатимиз раҳбари томонидан минтақавий ҳамкорликни ривожлантиришни назарда тутувчи илгари сурилган ташаббуслар
Ўзбекистон ташқи сиёсатида бошқа минтақалардаги шериклар борасида кириб келган йилда жиддий ўзгариш кузатилмайди. Давлат раҳбари маърузасида Россия, Хитой, Америка Қўшма Штатлари, Туркия, Германия, Франция, Буюк Британия, Жанубий Корея, Япония, Ҳиндистон, Покистон, Бирлашган Араб Амирликлари ва бошқа давлатлар билан кўп қиррали ўзаро манфаатли алоқаларни янада кенгайтириш ҳақида маълумот берилди.