Ўзбекистон республикаси олий ва ўрта маxсус таълим вазирлиги

Толанинг узунлиги. Толанинг ўртача узунлиги унинг технологик кўрсаткичлари орасида толанинг сифатини белгиловчи кўрсаткич бўлиб хизмат қилади. Пахта толасининг узунлиги тўқимачилик саноатида йигириш системасини аниқлашда асосий омил ҳисобланади. Узунроқ толалардан ингичка ва пишиқ ип ишлаб чиқарилади.
Толанинг узунлиги - тўғриланган толанинг икки учи орасидаги масофа бўлиб, миллиметрда ўлчанади. Бир намунада турли хил узунликдаги тола бўлиши мумкин. Шунинг учун толанинг узунлиги тушунчаси бир тола учун эмас, балки умумий намунадаги толаларнинг ўртача узунлигини ифодалаши лозим. Экиладиган гўзаларда толанинг узунлиги 18-20 мм дан 45-50, ҳатто 55-60 мм гача бўлиши мумкин.
Мамлакатимизда экилаётган ўрта толали гўзанинг кўпгина навларида пахта толасининг узунлиги 30-33 мм, айримларида 35-36 мм га етади, ингичка толали навларда эса 38-42 мм гача боради.
Толанинг узунлигини қўлда аниқласа ҳам бўлади. Бунда намунадан бир тутам тола олиниб, линейкада уларнинг узунлиги ўлчанади. Толанинг узунлигини махсус Жуков асбобида аниқланади.
Ҳар бир намуна пахтада айрим толаларнинг узунлиги турлича бўлганлиги сабабли йигириш системасини танлаш учун керакли тола узунликларининг ўртача кўрсаткичларини аниқлаш керак бўлади. Шунинг учун тола узунлигини аниқловчи ўртача масса узунлиги, модаль ва штапель узунлиги, тола базаси ва узунлиги жиҳатдан текислиги каби тушунчалар киритилган.
Толанинг ўртача масса узунлиги деганда намунадаги толаларнинг ўртача узунлигини уларнинг массасига кўпайтириб, намунанинг умумий массасига нисбати тушунилади.
Моделъ узунлиги тола намунасида энг кўп учрайдиган тола узунлигидир.
Штапель узунлик деганда модель узунликдан катта бўлган узунлик гуруҳларининг ўртача қиймати тушунилади.
Толанинг базаси модель узунликка яқин толаларнинг қанчалик кўп йигилишини характерлайди, яъни олинган пахта толаларнинг узунлик жиҳатдан текислик даражасини белгилайди.
Толанинг узунлик жиҳатидан текислиги ҳар хил типдаги пахта толаларнинг модель узунлигининг базага кўпайтмаси билан топилади. Агар толанинг текислик қиймати 1000 бўлса, тола узунлик жиҳатдан текис ҳисобланади.