Ўзбекистон республикаси олий ва ўрта маҳсус таълим вазирлиги

I. Кириш.
Республикамизда Давлат мустақиллигининг 17 йиллигини муносиб кутиб олиш учун қизғин тайёргарлик кўрилаяпди. Мустақиллигимизнинг илк кунларидан бошлаб, Президентимиз И.А. Каримов миллий хавфсизлигимизга катта эътибор қаратиб келмоқда. Шунинг учун ҳам бу структураларга кўмак берувчи тузилмаларни ривожлантиришга алоҳида эътибор берилади. Бундай тузилмаларга кинология ҳам киради. Бу соҳани мукаммал ривожлантириш мақсадида, Президентимиз И.А.Каримов “Миллий кинологияни ривожлантириш тўғрисида” ги фармонни имзолаган эди. Бу фармон асосида куч салоҳиятига эга бўлган тузилмаларда Миллий кинология марказлари ташкил қилинган ва унинг таркибида питомник (хизмат итларини тайёрлаш жойи) ҳамда кинолог инспекторлар тайёрлаш мактаби фаолият кўрсатиб келмоқда. Кинологияни ривожлантириш мақсадида ва унга малакали кадрларни тайёрлаш учун Самарқанд қишлоқ хўжалик институтида ”Кинология ва ит касалликлари” мутаҳассислиги бўйича магистратура очилди.
Кинология – итлар ҳақидаги фан бўлиб, итшунослик, яъни итларнинг тузилиши, келиб чиқиши ҳамда уларни асраш, озиқлантириш, турли хил хизматлар учун тайёрлаш, ўстириш ва урчитиш тўғрисидаги фандир.
Ит – ҳайвонлар орасида одам учун энг содиқ жонивор ҳисобланади. Ж.Кьювенинг таъкидлашича итлар инсоният учун энг ноёб, фойдали ва ўта мукаммал топилмалардан биридир. Инсон итларнинг ўта зеҳнлилиги, ҳидларни ўткир сезиши, яхши кўриши, эшитиши, тез чопиши ва чидамлилигини олдиндан сезиб, уларни бошқа ҳайвонларга нисбатан ўзига яқинлаштирган.
Қадимдан одамлар итлардан ов жараёнларида ҳамда турар жойларни қўриқлаш мақсадларида фойдаланишган. Шунингдек, итларни ҳарбий соҳада қўллаш, айниқса яхши самара беради. Улардан чегараларни қўриқлашда, жиноятчиларни топиб ушлашда, портловчи ва гиёҳванд моддаларни қидиришда, ҳарбий қурилмаларни қўриқлашда кенг фойдаланилмоқда. Бундан кўриниб турибдики, итлар одамларга нафақат руҳий кўмак беради, балки иқтисодни ривожлантиришга ҳам ўзларининг муносиб ҳиссаларини қўшиб келмоқдалар.
Мазкур қўлланма ўзбек тилида илк маротаба чоп этилиб, унда берилган маълумотлардан кинологлар, ветеринария врачлари, ветеринария ва зоомухандислик факултетлари талабалари, магистрлар ва умуман итларга меҳр қўйган одамлар фойдаланишса, ўз навбатида биз ҳам олдимизга қўйилган мақсадга қисман бўлсада эришдик деб ҳисоблаймиз.