Ўзбекистон республикаси олий ва ўрта махсус таълим вазирлиги қарши давлат университети

Тадқиқотнинг усуллари. Тадқиқотда қиёсий-тарихий, этимологик, статистик, компонент таҳлил, тавсифлаш ва таснифлаш усулларидан фойдаланилди.
Тадқиқотнинг илмий янгилиги:
- ишда ўзбек тили оронимлари Жанубий Ўзбекистон материаллари асосида тарихий-лисоний аспектда биринчи марта монографик тарзда тадқиқ этилди;
- оронимлар сирасига кирувчи атоқли отлар доираси ва оронимика соҳаси олдида турган ҳамда ўз ечимини кутаётган муаммолар кўлами белгиланди;
- оронимик индикатор (ОИ) ларнинг моҳияти, ономастик вазифаси аниқланди ва изоҳланди;
- ўзбек адабий тили ва шеваларига тегишли ОИ ларнинг оронимлар ясаш имкониятлари белгиланди, ўрни ва аҳамияти қиёсий тадқиқ этилди;
- ўзбек тили оронимлари биринчи марта луғавий-маъновий ва хронологик жиҳатдан таҳлил қилинди ҳамда тавсифланди;
- оронимларни топонимларнинг бошқа турлари вазифасига ўтиш тамойиллари аниқланди ва таҳлил этилди.
Тадқиқотнинг амалий натижалари қуйидагилардан иборат:
- Ўзбекистон оронимларининг лисоний хусусиятлари билан боғлиқ тўпланган материаллар, қўйилган муаммоларни тадқиқ этиш натижасида чиқарилган хулоса ва умумлаштирилган фикрлар ҳозирги ўзбек тилшунослиги учун муҳим илмий маълумотларни бериши, диссертация материаллари ўзбек ономастикаси, лексикологияси, терминологияси бўйича тадқиқотлар яратишда манба бўлиб хизмат қилиши, “Тарихий лексикология”, “Диалектология”, “Этнография”, “Ономастика”, “Фольклор”, “Адабий тил тарихи”, “Нутқ маданияти” каби фанларни ўқитишда амалий жиҳатдан ёрдам бериши асосланган;
- оронимия тадқиқи натижаларидан соҳавий, изоҳли, таржима луғатлар яратишда, шунингдек, Ўзбекистон тарихи, этнографияси, географиясини ўрганиш билан боғлиқ фанлардан дарслик ва ўқув қўлланмалар яратиш учун материал ва манба сифатида кўмаклашиши кўрсатилган.
Тадқиқот натижаларининг ишончлилиги муамммонинг аниқ қўйилгани, чиқарилган хулосаларнинг тавсифлаш, таснифлаш, компонент таҳлил, этимологик, математик-статистик каби усуллар воситасида асосланганлиги, назарий фикр ва хулосаларнинг амалиётга жорий этилганлиги, олинган натижаларнинг ваколатли ташкилотлар томонидан тасдиқланганлиги, оронимлар тадқиқига ўзбек тилининг табиатидан келиб чиқиб ёндашилганлиги билан белгиланади.