Ўзбекистон республикаси олий ва ўрта махсус таълим вазирлиги қарши давлат университети

Тадқиқотнинг мақсади Жанубий Ўзбекистон оронимларини тарихий-лисоний жиҳатдан тадқиқ этишдан иборат.
Тадқиқотнинг вазифалари. Диссертация мавзусининг мазмуни, моҳияти ва асосий мақсадидан келиб чиққан ҳолда мазкур иш ўз олдига қуйидаги вазифаларни қўяди:
- оронимлар таркибига кирадиган объект номлари доирасини белгилаш;
- оронимика соҳаси ўрганадиган илмий-назарий муаммолар ва амалий масалалар кўламини аниқлаш;
- оронимиканинг бошқа фанлар, жумладан, тилшуносликнинг турли бўлимлари билан алоқаси ҳамда аҳамиятини ёритиш;
- оронимик материалларнинг тилшунослик фани нуқтаи назаридан тадқиқ қилиниш даражасини аниқлаш ва шу асосда, ўзбек топонимикасининг бу соҳага оид муаммоларини белгилаш;
- оронимик индикаторлар (ОИ)ларнинг функционал хусусиятларини тадқиқ этиш; уларнинг адабий ва лаҳжавий вариантларига хос луғавий-маъновий хусусиятларини аниқлаш ҳамда илмий жиҳатдан умумлаштириш;
- ўзбек тили оронимларининг юзага келиши, шаклланиши учун асос бўлувчи лисоний ва нолисоний омилларни аниқлаш, шунингдек, оронимик номинация тамойилларини кўрсатиш;
- оронимларнинг луғавий-маъновий хусусиятларини ўрганиш, уларни лисоний жиҳатдан таснифлаш;
- ўзбек тили оронимларининг хронологик жиҳатдан таҳлил қилиш ва шу асосда уларда содир бўлувчи лисоний ўзгаришларга хос қонуниятларни кузатиш;
- оронимларнинг топонимиянинг бошқа турлари билан лисоний муносабатларини аниқлаш;
- оронимлар сирасида характерли бўлган айрим номларни этимологик таҳлил қилиш;
- ўзбек тили оронимларининг морфемик таркибини аниқлаш ва шу асосда уларнинг ясалиш хусусиятларини тадқиқ этишдан.
Тадқиқотнинг объекти Жанубий Ўзбекистон оронимларидир. Шунингдек, бу материалларни қиёслаш, илмий-назарий фикрлар ва хулосаларни асослашда бошқа ҳудудларга тегишли материаллардан ҳам фойдаланилди.
Тадқиқотнинг предмети сифатида Ўзбекистон оронимлари ҳақида маълумот берувчи тарихий, илмий, илмий-оммабоп услубдаги асарлар, илмий тадқиқотлар, табиий-географик хариталар, вилоятлар, туманлар тарихига доир илмий-оммабоп асарлар, энциклопедик, топонимик луғатлар, диалектологик экспедиция материаллари муҳим манба бўлиб хизмат қилди. Юқорида келтирилган манбалар ва хусусан, диссертант томонидан мустақил равишда ўтказилган изланишлар ва кузатишлар натижасида тўпланган икки мингга яқин ороним ва оротопонимлар таҳлилга жалб этилди.