Ўзбекистон республикаси адлия вазирлиги

5.5. Da’voga qarshi javobgar huquqlarini himoya qilishning protsessual vositalari

Fuqarolik protsessual qonunchilik da’vogar va javobgarga sud ishini yuritishda o‘z huquqlarini himoya qilishda teng imkoniyatlar beradi. Shunga muvofiq qonun javobgarga da’voga qarshi e’tiroz bildirish imkonini beradi. Javobgarning da’voga qarshi himoya-lanishi da’voga qarshi e’tirozning moddiy huquqiy va protsessual huquqiy vositalarini qo‘llash hamda qarshi da’vo berish yo‘li bilan amalga oshiriladi. Avvalambor, javobgar da’voga qarshi e’tiroz bildirishi mumkin.

Javobgar o‘ziga nisbatan qo‘zg‘atilgan da’voni inkor etishi va buning sabablari (vajlari)ni ko‘rsatishi mumkin. Da’voni bunday asoslantirilgan ravishda inkor etishga e’tiroz deb aytiladi.

E’tiroz o‘zining sohaviy tavsifi va mazmuni bo‘yicha moddiy huquqiy va protsessual huquqiy jihatlarga ajratiladi.

Da’voga qarshi javobgarning moddiy huquqiy himoyasi moddiy huquq borasida mazkur da’voning mohiyati bo‘yicha tan olmaslikda namoyon bo‘ladi. Masalan, javobgar da’vogarning talabi asoslangan qonun yoki o‘zga normativ-huquqiy hujjatning mavjud emasligini yoxud mazkur qonun yoki normativ-huquqiy hujjat o‘z kuchini yo‘qotgan, deb ta’kidlashi va ushbu holatni isbotlashi mumkin. Javobgar moddiy huquq me’yorlari nazarda tutgan da’voning barcha yoki alohida asoslarining yo‘qligiga da’vo muddati o‘tganligini ko‘rsatishi mumkin.