Ўзбекистон республикаси адлия вазирлиги тошкент давлат юридик университети

биринчидан, миллий меҳнат ҳуқуқ назариясида ва меҳнат қонунчилигида айрим тоифадаги ходимлар билан меҳнат шартномасини тузишнинг назарий асослари жуда кучсиз ишлаб чиқилган. Хусусан, нотипик меҳнат шартномаси тушунчаси ва унинг белгиларини ишлаб чиқиш, меҳнат шартларининг бирлиги ва дифференциациясини меҳнат ҳуқуқининг услуби ва тамойили сифатида намоён бўлишини кўрсатиб бериш, меҳнат ҳуқуқида дифференциацияни амалга ошириш ҳамда унинг чегаралари ва асосларини белгилаш, айрим тоифадаги ходимлар доирасини аниқлаш, меҳнатни ҳуқуқий тартибга солишнинг хусусиятларини белгиловчи мезонлар таснифини ишлаб чиқиш, электрон меҳнат шартномаларига таърифлар ишлаб чиқиш меҳнат ҳуқуқининг ҳар икки – меҳнат шартномаси ва айрим тоифадаги ходимлар меҳнатини тартибга солишнинг хусусиятлари институтларининг назарий асосларини мустаҳкамлайди.
Иккинчидан, мамлакатда олиб борилаётган ислоҳотларда тадқиқот мавзуси билан боғлиқ қонунчиликни такомиллаштириш кун тартибига қўйилган. Чунончи, 2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси ҳамда уни 2017 йил “Халқ билан мулоқот ва инсон манфаатлари йили”, 2018 йил “Фаол тадбиркорлик, инновацион ғоялар ва технологияларни қўллаб-қувватлаш йили”да амалга оширишга оид Давлат дастурларида ижтимоий соҳани ривожлантиришга қаратилган долзарб ҳуқуқий ислоҳотларни амалга ошириш назарда тутилган¹. Хусусан, Ўзбекистон Республикасининг “Давлат хизмати тўғрисида”ги, “Меҳнат миграцияси тўғрисида”ги, “Фан тўғрисида”ги, шунингдек, Ўзбекистон Республикасининг Меҳнат кодексига давлат органлари ва ташкилотларида меҳнатга ҳақ тўлаш ва меҳнатни нормалашни тартибга солувчи ўзгартиш ва қўшимчаларни киритишни назарда тутувчи қонун лойиҳаларини, 2018–2020 йилларда фуқароларнинг ўзини ўзи бошқариш органлари фаолияти самарадорлигини янада ошириш ва ривожлантириш Дастурини ишлаб чиқишнинг назарда тутилганлиги меҳнат ҳуқуқи соҳасида айрим тоифадаги ходимлар меҳнатини ҳуқуқий тартибга солишга қаратилган меҳнат қонунчилигини такомиллаштиришни талаб қилмоқда. Ушбу қонунларни ва дастурларни қабул қилиниши давлат хизматчилари, меҳнат мигрантлари, чет эл фуқаролари, илмий ва педагогик ходимлар, фуқаролар ўзини ўзи бошқариш органлари ходимлари билан меҳнат шартномаларини тузишнинг ўзига хос хусусиятларини белгилаб олишга имкон беради.