Ўзбекистан темир йўллари

МАНЁВРЛАРНИ АМАЛГА ОШИРИШ

62. Манёврлар пайтида стрелкалар қуйидаги ходимлар томонидан ўтказилиши мумкин:
а) марказий пултдан туриб тегишли ходимларга радио алоқа ёки станциялар бўғизларида ўрнатиладиган телефонлар бўйича диспетчерлик алоқаси орқали маршрутни манёвр ҳаракатларига тайёр эканлиги тўғрисида кўрсатмалар бериш йўли билан поезд диспетчери томонидан;
б) станция бошлиғи ёки станция резерв бошқарувга топширилган пайтда поездларни қабул қилиш ва жўнатиш вазифаларини бажариш юклатилган бошқа ходим томонидан;
в) станциянинг алоҳида стрелкалари маҳаллий бошқарувга топширилганда, ДАТК раиси томонидан тасдиқланадиган поездлар ҳаракати ва манёвр ишларини диспетчерлик марказлашувида ташкил қилиш бўйича маҳаллий йўриқномага мувофиқ поезд тузувчиси ёки станциянинг бошқа ходими томонидан.
Станция йўлларида якка локомотив ва ўзи юрар ҳаракат таркиби ҳаракатланганда, маҳаллий бошқарувга топширилган стрелкалар локомотив бригадаси ходимларидан бири (ҳайдовчи) томонидан ўтказилиши мумкин.
Стрелкаларни ўтказаётган ходим ҳар сафар, стрелкалар ўтказилгандан сўнг, маҳаллий бошқарув пултидаги назорат асбоблари ёки острякларнинг ҳолати бўйича острякларнинг тўғри ўрнатилганига ишонч ҳосил қилиши лозим.


63. Ажратилган стрелкали участка бўшагунча, стрелканинг изоляцияси боғлиқликка қўшилмаган жойларда эса, стрелка ҳаракат таркибидан бўшагунча маҳаллий бошқарув пултидан туриб маҳаллий бошқарув калити билан стрелкани ўтказиш тақиқланади.


64. Манёврлар якунлангандан сўнг стрелка ва манёвр дастаклари, шунингдек, маҳаллий бошқарув калити нормал ҳолатга келтирилади, манёврлар раҳбари иш тугагани хақида поезд диспетчерига ахборот беради, ўз навбатида поезд диспетчери тегишли кнопкаларни нормал ҳолатга келтиради.


65. Маҳаллий бошқарув пултлари доимо ёпиқ бўлиши шарт. Фойдаланиш ёки кўрик учун маҳаллий бошқарув пултига кириш рухсат этилган ходимларнинг рўйхати, шунингдек, пултларни калитини бериш ва сақлаш тартиби ДАТК минтақавий темир йўл узели бошлиғи томонидан белгиланади.