|
МАРКАЗЛАШТИРИЛГАН ДИСПЕТЧЕРЛИК ҚУРИЛМАЛАРИ
НОСОЗЛИГИДА ИШЛАШ ТАРТИБИ
66. Агар тўғри белгиланган маршрутда ва қабул қилиш йўлининг (бошқарув асбоблари кўрсатмалари бўйича) бўш ҳолатида кириш светофори очилмаса, поезд унинг тақиқ кўрсатмасида поезд диспетчерининг локомотив машинистига берадиган қуйидаги шаклдаги қайд этилувчи буйруғи бўйича киритилади:
«№____поездни _____ станциянинг _____ йўлига кириш светофорининг тақиқ кўрсатмасида киришига рухсат бераман. ДНЦ ____».
Поезд диспетчерининг буйруғи бўйича станцияга кирганида машинист поездни 20 км/соат дан ортиқ бўлмаган тезликда, ўта эҳтиёткорлик билан ва ҳаракатга тўсиқ учраса дарҳол тўхтатишга тайёр ҳолда юритиши лозим.
Станция резерв бошқарувга топширилган даврда кириш светофорининг носозлигида поезд ушбу Йўриқноманинг 265 пунктида кўзда тутилган тартиб бўйича қабул қилинади.
67. Чиқиш светофорининг носозлигида поезд фақат перегон қарама-қарши келаётган поездлардан бўш ҳолда ва поезд диспетчерининг машинистга узатадигаи қуйидаги шаклдаги буйруғи билан жўнатилаётган поезд учун ҳаракат йўналиши белгиланганида жўнатилади:
«№ _____ поездга _____ станциядан ____ йўл бўйлаб ____ чиқиш светофорининг тақиқ кўрсатмасида жўнашга рухсат бераман. ДНЦ ___».
Бундай буйруқни олгандан сўнг машинист станциядан жўнаб, биринчи ўтиш светофоригача поездни 20 км/соат дан ортиқ бўлмаган тезликда ўта эҳтиёткорлик билан ва ҳаракатга тўсиқ учраса, дарҳол тўхташга тайёр ҳолда юритиш, сўнгра автоблокировка сигналлари бўйича ҳаракатланиш хуқуқига эга.
Автоматик локомотив сигнализацияси билан жиҳозланган участкаларда поезд перегонга кирганидан cўнг машинист ушбу йўриқноманинг 34 бандида кўзда тутилган тартибда ҳаракатланади.
Станция резерв бошқарувида бўлганда, носоз чиқиш светофорида поездни жўнатиш ушбу Йўриқноманинг 30 ва 31 бандларида кўзда тутилган тартибда амалга оширилади.
68. Стрелкани марказий пултдан ўтказишнинг иложи бўлмаса, поезд диспетчери стрелкаларни тозаловчи ходимни ёки станциянинг бошқа ходимини чақириб, стрелкани кўрикдан ўтказишни ва имкон бўлса, бошқарув бузилиши сабабини бартараф этишни (масалан, остряк ва ром рельси орасига тушган ёт жисмни олиб ташлашни) талаб қилади. Агар тегишли ходим ташқи кўрик натижасида стрелкани ўтмаслиги сабабини аниқлай олмаса ва бартараф этолмаса, диспетчер ушбу стрелка бошқа ҳолатга ўтказилиши лозим бўлган маршрутлар бўйича поездларни ўтказишни тўхтатади, уни кўрикдан ўтказиш ва таъмирлаш учун электрмеханикни чақиртиради, ушбу стрелка эса маҳаллий бошқарув пултидан ўтказилади ёки станция резерв бошқарувга ўтказилади.
Стрелкани маҳаллий бошқарув пултидан ўтказишнинг иложи бўлмаса, стрелка ушбу Йўриқноманинг 389 бандида белгиланган тартибда қўлда бошқарувга топширилади, бу ҳолат поезд диспетчерининг буйруғи билан расмийлаштирилади.
Навбатчи ходимлар хизмат кўрсатмайдиган алоҳида пунктларда стрелкаларни кўрикдан ўтказиш, зарур ҳолларда уларни ўтказиш учун ҳам ДАТК раиси томонидан белгиланган тартибда ўтаётган поездларнинг локомотив бригадалари жалб этилиши мумкин.
69. Стрелкали ажратилган участка носозлиги сабабли сохта бандликни кўрсатса, стрелкаларнинг тегишли гуруҳи маҳаллий бошқарув пултидаи ўтказилади ёки станция резерв бошқарувга топширилади.
70. Табло қабул қилиш йўлининг соҳта бандлигини кўрсатаётганда, шикаст тузатилгунга қадар поезд диспетчери, одатда, поездларни ушбу йўлга қабул қилмаслиги керак. Зарур ҳолатда, станция бошлиғи ёки поездларни қабул қилиш ва жўнатиш вазифалари юклатилган ўзга ходим орқали қабул қилиш йўлининг бўшлигини поезд диспетчери текширгандан сўнг, унинг қайд этилувчи буйруғига биноан, поезд ушбу йўлга ёпиқ кириш светофорида қабул қилинади ёки станция резерв бошқарувга топширилади.
Ташишларни ташкил қилиш бошқармаси навбатчи ходимлари томонидан хизмат кўрсатилмайдиган алоҳида пунктларда, қабул қилиш йўлининг бўшлигини текшириш ДАТК раиси томонидан белгиланган тартибда локомотив бригадасига юклатилиши мумкин.
71. Бир ёки бир неча станциянинг кодли бошқаруви носозлигида поезд диспетчери ушбу станцияларни резерв бошқарувга ўтказиши лозим. Бундай ҳолларда ушбу станцияларнинг йўллари, стрелкалари ва светофорлари ҳолатини назорат қилувчи асбобларнинг кўрсатмаларига таяниш тақиқланади.
72. Перегонни чегараловчи станциялардаги автоблокировканинг носозлигида, диспетчернинг кўрсатмаси бўйича навбатчиликка станция бошлиқлари ёки поездларни қабул қилиш ва жўнатиш вазифалари юклатилган ўзга ходимлар киришадилар.
Поезд диспетчерининг буйруғига биноан автоблокировка амал қилиши тўхтатилади ва поездлар ҳаракати телефон алоқа воситалари орқали ўрнатилади. Телефон алоқага ўтишни расмийлаштиришдан аввал поезд диспетчери станциялараро перегоннинг бўшлигини аниқлаши, станцияларни эса резерв бошқарувга топшириши керак.
Агар, носоз автоблокировкали перегонлар поездларни қабул қилиш ва жўнатиш вазифаларини бажарувчи навбатчи ходимлар штати бўлмаган алоҳида пунктлар билан чегараланган бўлса, токи станцияга тегишли ходимлар чақиртирилгунга қадар, поезд диспетчери йўл ва стрелкалар ҳолатини назорат қилаётган бўлса, алоҳида поездларни бўш перегонга бевосита локомотив машинистига ушбу Йўриқноманинг 42 бандида белгиланган шаклда узатиладиган поезд диспетчерининг қайд этилувчи буйруғига биноан жўнатилиши мумкин. Бундай тартибни қўллаш рухсат этилган перегонлар ва поездлар ҳаракати хавфсизлигини таъминлаш бўйича талаблар ДАТК раиси томонидан белгиланади.
73. Автоблокировкани бошқариш асбоблари ёрдамчи режим дастаклари ёки кнопкалари билан жиҳозланган бир йўллик перегонларда, хақиқатда бўш перегон банд деб кўрсатилиши оқибатида поезд диспетчери ҳаракат йўналишини ўзгартира олмаса ва чиқиш светофорини очолмаса, автоблокировка амал қилишини тўхтатиш талаб этилмайди. Бу ҳолатда перегоннинг бандлигини аниқлагандан сўнг поезд диспетчери чегараловчи алоҳида пунктларга станция бошлиқларини ёки поездларни қабул қилиш ва жўнатш вазифалари юклатилган бошқа ходимларни чақириб, махсус дастак (кнопка) лар ёрдамида автоблокировка йўналишини ўзгартиришга кўрсатма беради. Чақиртирилган ходимлар пломбаларни ечадилар, автоблокировка йўналишини ўзгартирадилар ва назорат асбобларининг кўрсатмалари бўйича йўналиш ўзгарганлигига ишонч ҳосил қилгандан сўнг, ёрдамчи дастак (кнопка) ларни нормал ҳолатга келтирадилар. Шундан сўнг поездлар автоблокировка бўйича поезд диспетчери томонидан жўнатилади.
Станцияга ҳаракат йўналишини ўзгартириш билан боғлиқ вазифаларни бажариш учун чақиртирилиши мумкин бўлган ходимлар штати мавжуд бўлмаган алоҳида пунктлар билан чегараланган айрим перегонларда автоблокировка бўйича йўналишни ўзгартириш ёрдамчи дастак (кнопка) лари бевосита поезд диспетчерининг пултида ўрнатилиши мумкин. Бундай перегонлар руйхати ва ҳаракат йўналишини ўзгартириш бўйича поезд диспетчери бажарадиган амаллар тартиби ДАТК раиси томонидан белгиланади.
Йўналишини ўзгартириш имкони бўлмаган ҳолларда автоблокировкадан фойдаланиш тўхтатилади.
74. Ушбу бобда кўрсатилган тартиб Марказлаштирилган диспетчерликда поездлар ҳаракати ва манёвр ишларини ташкил этишнинг асосий қоидаларини белгилайди.
Ушбу қоидаларга мувофиқ ҳар бир участка (йўналиш) учун конкрет шароитларни ҳисобга олиб ДАТК раиси томонидан тасдиқланадиган йўриқнома ишлаб чиқилади.
Do'stlaringiz bilan baham: |
