Ózbekistan respublikasí joqarí HÁm orta arnawlí bilimlendiriw ministrligi

«Jeneva puqarası» hám onıń tiykarǵı ideyaları. Jan Jak Russo (1712-1778) Bul adamnıń ómir jolı ayrıqsha qıyın boldı. óspirimlik jıllarınnan baslap ol quwanıshsız miynet, jetispewshilik, qorlıqtı kórdi. Evropa boylap, kóbinese piyada, qańǵırıp júrdi. Kásiplerin almastırıp kórdi, biraq birewide oǵan pul da, dańqta keltirmedi. Kitaplar jazdı, olar húkimdarlardıń buyrıǵı menen ashıqtan-ashıq órtep jiberildi, onıń ózi bolsa qashqınlıqta júrdi. Biraq sońǵı kúnlerine deyin tınıshlıqqa erispegen bul insan ómiriniń aqırlarında pútkil francuz jasları pikirinıń húkimdarı boldı.

Danıshpan jeke múlktiń payda bolıwı insaniyatqa teńsizlik, qullıq hám basqa apatlar keltirgenin dálilledi. «Jámiyettiń bunnan keyingi bárshe rawajlanıwı,-deydi Russo, kambaǵallardıń baylar, ázzilerdıń kúshliler tárepinen eziliwin payda etetuǵın teńsizliktiń ósip barıwı». Biraq Russo jeke múlkti joq etiw kerek dep esaplamas edi hám tek onıń muǵdarın kemeytiriwdi qáler edi. Baylıq hám kambaǵallıqtıń shegaraların teńlestiriw – Russonıń pikirinshe nızam shıǵarıwshınıń wazıypası mine sol. «Eger siz, - dep jazar edi, - mámleketti bekkem etpekshi bolsańız, onda baylıq hám kambaǵallıq shegaralarıń imkanı barınsha jaqınlastırıń: sheksiz baylıqqa da, sheksiz kambaǵalıqqada jol qoymań». Joqarı hákimiyat tek xalıqtiki bolıwı kerek, dep esaplar edi. Sonıń ushında, danıshpannıń idealı – hár bir shańaraq ózine kerekli hámme nárselerdi ózi jetistiretuǵın mayda mulkdarlardıń demokratik respublikası edi.

Respublikanı talap etiw, hákimiyat pútkil xalıqqa tiyisli ekenligi haqındaǵı táliymat 1789-1799-jıllardaǵı francuz revolyuciyası dáwirinde ózinıń táreptarların taptı.