Ўзбек тили, адабиёти ва фольклори институти ҳузуридаги илмий даражалар берувчи dsc

Тадқиқотнинг мақсади Усмон Носир шеърияти тилидаги поэтик актуаллашган лисоний бирликларни аниқлаш, тавсифлаш, таърифлаш ва шу асосда унинг асарларини лингвопоэтик жиҳатдан тадқиқ этишдан иборат.
Тадқиқотнинг вазифалари:
ўзбек тилшунослигида бадиий тилга муносабат, бадиий матнга лингвопоэтик ёндашув ҳамда ўзбек филологиясида лингвопоэтик тадқиқотларнинг пайдо бўлиши ва шаклланиш масалаларини атрофлича ёритиш;
Усмон Носирнинг сўзларнинг шакл ва маъно муносабатига кўра турларидан лингвопоэтик ва мантиқий таъкид мақсади билан фойдаланиш маҳоратини таҳлил қилиш;
шоир шеъриятида унинг ўзи тарафидан ясалган окказионализмлар ва миллий тилнинг асосий унсурлари ҳисобланмиш шевага оид сўзларнинг лингвопоэтик қимматини баҳолаш;
ижодкор шеъриятидаги халқ мақоллари ва фразеологизмларнинг поэтик актуаллашуви механизмларини аниқлаш;
Усмон Носирнинг ономастик бирликлар ва риторик сўроқ гаплардаги мавжуд поэтиклик потенциалини намоён этиш маҳоратини кўрсатиш;
шоир ижодидаги ўхшатишлар, эпитетлар, перифразалар, метафоралар, метонимия, синекдоха ва жонлантириш каби тасвирий воситаларнинг қўлланилиши билан боғлиқ ўзига хос лингвопоэтик хусусиятларини аниқлаш;
Усмон Носир шеъриятидаги фонетик, лексик ва синтактик такрорларнинг лингвопоэтик хусусиятларини очиб бериш ҳамда такрорий бирликларнинг бадиий санъат ҳосил қилишдаги иштирокини баҳолаш.
Тадқиқотнинг объекти сифатида Усмон Носирнинг 1969 йил нашр қилинган (Усмон Носир. Танланган асарлар. Биринчи том. – Тошкент: Ғ.Ғулом номидаги бадиий адабиёт нашриёти. 1969. – 163 б.) ҳамда 1970 йил нашрдан чиққан (Усмон Носир. Танланган асарлар. Иккинчи том. – Тошкент: Ғ.Ғулом номидаги бадиий адабиёт нашриёти. 1970. – 190 б.) китобларидаги шеърий асарлар олинди.
Тадқиқотнинг предмети сифатида Усмон Носир шеърияти тил бирликларининг лингвопоэтик хусусиятлари танланган.
Тадқиқотнинг усуллари. Тадқиқот мавзусини ёритишда таснифлаш, тавсифлаш, қиёслаш, компонент ва контекстуал таҳлил, семантик –стилистик, лингвопоэтик таҳлил методларидан фойдаланилди.