Yangi davr arab adabiyoti

MUHAMMAD ShAZILI XAZNADAR  
Muhammad  Shazili  Xaznadar  (1881-1954)  Tunisning  XX  asr  birinchi  yarmidagi  eng 
buyuk  yozuvchilaridan  hisoblanadi.  Uning  bobosi  vazir  bo‘lib,  adib  uning  saroyida  dunyoga 
keldi va adabiy doiralarda tarbiya topdi. Xaznadar biror maktabda o‘qimagan bo‘lsa ham, yuksak 
darajada  bilim  oldi.  Uning  ismi  yoshlik  yillaridayoq  «al-Sa’da  al-uzma»  jurnali  e’lon  qilgan 
«Insonning  ijtimoiy  va  shaxsiy  hayoti  haqida  qanday  fikrdasiz?»  konkursi  orqali  tanildi.  Bu 
tanlovda Xaznadar birinchi  o‘rinni oldi va bu hol  uni  keyingi  ijodiy ishlarga rag‘batlantirdi. U 
Tunis va boshqa arab mamlakatlari gazeta va jurnallarida o‘z she’rlari, maqolalari bilan qatnasha 
boshladi.  
Xaznadarni  1910  yilda  Tunis  malikushshuarosi  deb  e’lon  qiladilar,  Misrda  uni  Ahmad 
Shavqiyga  tenglashtiradilar.  An’anaviy  uslubda  yozilgan  she’rlarida  (masalan,  «Nido») 
Xaznadar arablarning shavkatli o‘tmishini ta’rifladi.  

---

 
158 
Xaznadar madaniy taraqqiyotni islom bilan chambarchas bog‘liq holda, rivojlanishni esa, 
xulafoi roshidin hayotiga taqlid qilish shaklida tasavvur qilar edi. «Roshidin zamoniga nigohimni 
qarataman,  unga  qudratli  tayanch  qal’asidek  murojaat  qilaman.  Ular  zamonida  masalalar 
kengash  bilan  hal  qilinar  edi,  din  yo‘lboshchi  edi,  ular  esa  dinning  himoyachisi  edilar.  G‘aflat 
uyqusida yotgan bu xalqqa bir nazar solsangchi!»  
Mustamlakachilikka  qarshi  chiqishlari  uchun  Xaznadar  qamoqqa  tashlandi,  ozodlikka 
chiqqach  yana milliy manfaatlarni himoya qilishda  davom  etdi. Xaznadar ko‘p  yillar davomida 
«Dastur» siyosiy partiyasi faoliyatida ishtirok etdi, 1946 yilda undan chiqqan bo‘lsa ham, lekin 
turli dolzarb siyosiy muammolar haqida o‘z qarashlarini izhor etishda davom etdi.