Yangi davr arab adabiyoti

MAROKASh ADABIYoTI  
Ijtimoiy-iqtisodiy  taraqqiyot  Marokashda  boshqa  arab  mamlakatlariga  ko‘ra  kechroq 
yuzaga  chiqdi.  Mamlakat  taraqqiyoti  nafaqat  kolonial  tuzum  tufayli,  balki  feodal 
munosabatlarning  hukmronligi  sababli  ham  sust  kechardi.  Marokashning  ma’naviy  hayotida 
uzoq  vaqt  turg‘unlik  hukm  surdi.  Bu  turg‘unlik  mamlakatning  Misr,  Suriya,  Livan,  hatto  eng 
yaqin  qo‘shni  –  Jazoir  bilan  deyarli  butunlay  madaniy  aloqaga  kirishmaganligi  sababli  og‘ir 
oqibatlarga olib keldi. O‘tgan asrning oxirlarida, masalan, mamlakatga faqat bir arabcha gazeta – 
«al-Ahrom»  («Piramida»)  kelar  edi,  xolos.  Faqat  XX  asrning  boshlariga  kelib  Marokashning 
o‘zida  arabcha  gazetalar  chiqa  boshladi  va  ular  xalqni  arab  dunyosida  kechayotgan  voqealar 
bilan tanishtirdi. Bu vaziyatlar Marokashda adabiyotning rivojlanishida ham o‘z izini qoldirdi.  
Marokash  adabiyotida  Ikkinchi  jahon  urushidan  keyingina  jonlanish  boshlandi.  Bu 
davrda  arabcha  yozadigan  adiblar  bilan  bir  qatorda  fransuz  tilida  ijod  qiladigan  prozaiklar  – 
Ahmad  Sefriun,  Dris  Shraybi  hamda  shoir  va  faylasuf  Muhammad  Aziz  Laxbabi  adabiyotga 
kirib keldilar.  
Marokashning  arabiyzabon  yozuvchilari  ijodiga  XX  asrning  o‘rtalarigacha  o‘rta  asrlar 
an’analari  o‘zining  barakali  ta’sirini  ko‘rsatib  turdi.  Keyinroq,  faqat  40  –  yillarning  oxirlariga 
kelib  esa,  matbuotning  va  u  bilan  bog‘liq  holda  publisistikaning  rivojlanishi  tufayli  hozirgi 
zamon  nasri  uslubi  shakllana  boshladi.  Bu  uslub  Abdul  Xafid  al-Fasi,  Ben  Abbos  al-Kabbaj, 
Abdulloh  al-Kattani,  Muhammad  al-Makri  kabi  publisistlar  va  nasrnavislar  ijodida  bosqichma-
bosqich shakllanib bordi.  
Publisistika bilan deyarli bir vaqtda Marokash adabiyotida yangi nasr rivojlandi, novella 
janri ma’lum muvaffaqiyatlarga ham erishdi. Abdulmajid Ben Jellun va Abdulkarim Gallab bu 
janrning ko‘zga ko‘ringan namoyandalari sifatida maydonga chiqdilar.