Qonuni aholi bandligi to‘G‘risida

46-modda. Ishsiz shaxslarning kelishini hisobga olish
Ishsiz deb e’tirof etilgan shaxslar ishsizlik nafaqasini olish davrida bir oyda kamida ikki marta mahalliy mehnat organlariga kelishi shart. Kelish jadvali, sanasi va vaqti ish qidirayotgan shaxslarni ro‘yxatga olishni amalga oshiruvchi mahalliy mehnat organi xodimi tomonidan ishsiz shaxsning mahalliy mehnat organiga kelishi qulayligi hisobga olingan holda belgilanadi.
Ishsiz shaxs mahalliy mehnat organiga kelganda mahalliy mehnat organining xodimi:
ishsiz shaxs bilan mazkur shaxsning ishsiz shaxs sifatida maqomini belgilashga va uni ishga joylashtirishga ta’sir ko‘rsatishi mumkin bo‘lgan holatlarda yuz bergan o‘zgarishlar to‘g‘risida suhbat o‘tkazadi;
ishsiz shaxsni mavjud bo‘sh (vakant) ish o‘rinlari to‘g‘risida, kasbga tayyorlashdan, qayta tayyorlashdan o‘tish yoki malakasini oshirish imkoniyatlari haqida, shuningdek haq to‘lanadigan jamoat ishlari to‘g‘risida xabardor qiladi;
maqbul keladigan ish mavjud bo‘lganda ishga joylashtirishga doir yo‘llanma yoki ishga joylashishga ko‘maklashish yuzasidan murojaatnoma beradi.
Mahalliy mehnat organi ishsiz shaxslarning o‘z vaqtida mahalliy mehnat organiga kelib turishi yuzasidan monitoringni amalga oshiradi.
Ishsiz shaxslarning mahalliy mehnat organlariga kelishini hisobga olish ularning ish qidirish va ishga joylashishdagi faolligini oshirish, ularga mavjud bo‘sh (vakant) ish o‘rinlari to‘g‘risidagi joriy axborotni taqdim etish, shuningdek ularning ishga joylashishiga va ijtimoiy jihatdan himoya qilinishiga ta’sir ko‘rsatishi mumkin bo‘lgan ma’lumotlarning ular tomonidan o‘z vaqtida olinishini ta’minlash maqsadida amalga oshiriladi.
47-modda. Ishsiz shaxslarni moddiy jihatdan qo‘llab-quvvatlash kafolatlari
Davlat ishsiz shaxslarga quyidagilarni kafolatlaydi:
ishsizlik nafaqasi to‘lanishini;
mehnat organlarining yo‘llanmasi bo‘yicha kasbga tayyorlash, qayta tayyorlash yoki malaka oshirish davrida stipendiya to‘lanishini va shu davr umumiy mehnat stajiga qo‘shilishini;
mahalliy mehnat organlarining yo‘llanmasiga ko‘ra bepul, shu jumladan grantlar hisobidan kasbga tayyorlash, qayta tayyorlash va malaka oshirishni;
haq to‘lanadigan jamoat ishlariga jalb etish imkoniyatini;
tadbirkorlik faoliyatiga jalb etishga hamda shaxsiy tomorqa yer uchastkalarini rivojlantirishga qaratilgan, ushbu Qonun 19-moddasi ikkinchi qismining uchinchi va beshinchi xatboshilarida nazarda tutilgan subsidiyalarni olish imkoniyatini;
mahalliy mehnat organlarining taklifiga ko‘ra ishlash uchun ixtiyoriy ravishda boshqa yerga ko‘chib o‘tish bilan bog‘liq xarajatlar kompensatsiya qilinishini.