Qonuni aholi bandligi to‘G‘risida

48-modda. Ishsiz shaxsni mahalliy mehnat organlarida hisobdan chiqarish uchun asoslar
Ishsiz shaxs quyidagi hollarda mahalliy mehnat organlarida hisobdan chiqarilishi mumkin:
ishga joylashganda;
ushbu Qonun 19-moddasi ikkinchi qismining uchinchi va beshinchi xatboshilarida nazarda tutilgan subsidiyani olganda;
Oldingi tahrirga qarang.
O‘zbekiston Respublikasining Bandlikka ko‘maklashish davlat jamg‘armasi mablag‘lari va qonunchilikda taqiqlanmagan boshqa manbalar hisobidan mikrokredit olganda;
(48-modda birinchi qismining to‘rtinchi xatboshisi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
o‘zini o‘zi band qilgan shaxs sifatida ro‘yxatga olinganda;
Oldingi tahrirga qarang.
qonunchilikka muvofiq pensiya ta’minoti huquqiga ega bo‘lganda (pensiya turidan qat’i nazar);
(48-modda birinchi qismining oltinchi xatboshisi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
shaxs doimiy yashash uchun boshqa joyga ko‘chib o‘tganda;
uzrli sababsiz mahalliy mehnat organiga kelmaganda;
O‘zbekiston Respublikasidan tashqarida vaqtinchalik mehnat faoliyatini amalga oshirganda;
maqbul keladigan ishga doir takliflarni muntazam ravishda (ikki martadan ko‘p) rad etganda;
ishga joylashtirishga doir yo‘llanmani yoki ishga joylashishga ko‘maklashish yuzasidan murojaatnomani olishga kelishdan bo‘yin tovlaganda;
shaxs qonunga xilof ravishda ishsiz shaxs deb e’tirof etilganligi fakti aniqlanganda;
sudning ozodlikdan mahrum qilish yoki axloq tuzatish ishlari tarzidagi jazoni nazarda tutuvchi hukmi qonuniy kuchga kirganda;
muddatli harbiy xizmatga chaqirilganda;
ishsiz shaxs vafot etganda.
Ushbu modda birinchi qismining sakkizinchi — o‘n birinchi xatboshilarida nazarda tutilgan asoslarga ko‘ra hisobdan chiqarilgan shaxslar ishsiz sifatida mahalliy mehnat organida hisobdan chiqarilgan kundan e’tiboran o‘ttiz kalendar kun o‘tgach mahalliy mehnat organiga ish qidirayotgan shaxs sifatida takroran murojaat qilish huquqiga ega.
Ishsiz shaxsni mahalliy mehnat organida hisobdan chiqarish mahalliy mehnat organi rahbarining buyrug‘i bilan rasmiylashtiriladi, buyruqda ishsiz shaxsni hisobdan chiqarish asosi, shuningdek shaxs hisobdan chiqariladigan sana ko‘rsatiladi.
Ishsiz shaxsni mahalliy mehnat organida hisobdan chiqarish to‘g‘risidagi ma’lumotlar “Bandlik xizmati” axborot tizimiga kiritiladi.