«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Профилактикаси. Ҳайвонларнинг рибофлавинга бўлган эҳтиёжларининг қондирилиши назорат қилинади, юқори концентрат типида боқилганда 1 кг озиқага 2-3 мл рибофлавин қўшиш тавсия этилади. Витаминнинг танқислигини камайтириш учун рационга озиқабоп ачитқилар, ёғи олинган сут, кўкат озиқалар, ўт унлари, омихта силос киритилиши лозим.


Никотин кислотасининг етишмовчилиги (РР гиповитаминози, пеллагра, hypovitaminosis - PP) - терининг, ҳазм тракти ва асаб тизимининг ўзига хос жароҳатланиши билан ўтадиган касаллик бўлиб, асосан чўчқалар, итлар ҳамда кам даражада бошқа турдаги ҳайвонлар касалланади.
Биологик таъсирига кўра никотин кислотаси никотинамидларга ўхшаш бўлади, организмда никотинамидлар никотин кислотасига ёки кислота амидларга айланиб туради. Никотин кислота ва унинг амиди ўсимликлар ва ҳайвонлар тўқимасида бўлади, ҳазм канали микрофлоралари томонидан синтезланади. Никотинамид ҳайвонлар организмида триптофандан синтезланиши мумкин. Бу жараёнда рибофлавин ва пиридоксин иштирок этади.
Сабаблари. Пеллагра маккажўхори асосий озиқаси ҳисобланган хўжаликларда учрайди. Буни маккажўхори ўсимлигида никотин кислотаси ва триптофаннинг камлиги билан изоҳлаш мумкин. Агар чўчқалар рационида 77 фойизгача макка дони бўлса озиқлантиришнинг 17-33 кунларига келиб никотинамид етишмовчилигининг белгилари пайдо бўлади. Бузоқларда барвақт сунъий сут беришга ўтиш оқибатида, итлар фақат қайнатилган гўшт билан боқилганда касаллик ривожланиши мумкин.
Қорамолларда ҳазм трактининг сурункали касалликларида (катта қорин ацидози, алкалози, гастроэнтерит ва бошқалар) витаминнинг микробиал синтези бузилганда, протеин, тиамин, рибофлавин, пиридоксин ва бошқа В гуруҳига мансуб витаминлар етишмовчилиги оқибатида келиб чиқади.
Ривожланиши. Никотин кислотаси ва унинг амиди етишмаганда дигидрогиназалар, кооферментларининг синтези издан чиқади ва шунингдек, оксидланиш қайтарилиш жараёнлари, тўқималардан газлар алмашинуви бузилади, тери, ҳазм тракти ва асаб тизимида дистрофик ва атрофик жараёнлар ривожланади. Никотин кислотаси танқислиги оқибатида ҳазм трактининг секретор-ферментатив функцияси пасаяди. Терининг эпидермис қавати, ўсиши, эритропоэз фагоцитоз издан чиқади, оқибатда организмнинг чидамлиги пасаяди.