«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Цианокобаламиннинг етишмовчилиги (В₁₂ гиповитаминоз - В₁₂-hypovitaminosis) - кучайиб борувчи анемия, ариқлаш, ўсишдан қолиш билан характерланиб, асосан чўчқалар, мўйнали ҳайвонлар, паррандалар, баъзан қорамол, отлар ва бошқа ҳайвонлар касалланади.
В₁₂ витамини (кобаламин, цианокобаламин, антианемик витамин) таркибида кобальт металлини сақловчи ягона витамин ҳисобланади. Цианокобаламин фақатгина гетеротроф микроорганизмлар томонидан синтезланади. Ўсимликлар ҳайвонлар тўқимаси бундай хусусиятга эга эмас. Ҳайвонларнинг В₁₂ витаминига бўлган эҳтиёжи ҳайвонот оламидан олинадиган озиқалар ва витаминнинг кобальт элементи етарли миқдорда бўлганда ошқозон олди бўлимлари ҳамда тўғри ичакда микробиал эндоген синтези ҳисобига қондирилади.
Сабаблари. В₁₂ витамини етишмовчилиги ва унинг микробиал синтезининг ёмонлашувига турли омиллар: ошқозон-ичакларнинг сурункали касалликлари, ичак паразитлари, сифациз ва замбуруғлар билан зарарланган озиқаларнинг берилиши, кобальтнинг етишмовчилиги, антибиотикларни назоратсиз ишлатиш сабаб бўлади.
В₁₂ витаминининг ичаклар девори орқали фаол сўрилиш учун ошқозон суюқлигида ўзига хос оқсил-мукопротеид (транскоррин) бўлиши лозим. Шунинг учун ошқозон яраси, сурункали гастрит В₁₂ гиповитаминозга сабаб бўлиши мумкин. Бузоқлар, қузилар, чўчқа болалари ва тойларда касаллик сут таркибида В₁₂ витамининг етишмовчилиги оқибатида ривожланади. Итлар эса гўштли озиқалар кам берилганда касалланади.
Ривожланиши. Биологик реакцияларда эркин ҳолдаги цианокобаламин эмас, балки В₁₂ коферментлар ёки кобамидли ферментлар иштирок этади. Кобамидли ферментларнинг трансметилланиш реакцияларида иштирок этишидан метионин, ацетат ҳосил бўлади, шунингдек, холин, креатинин, нуклеин кислоталар синтези ва бошқа реакцияларда иштирок этади.
Цианокобаламиннинг етишмовчилигида оқсиллар, углеводлар ва липидлар алмашинуви, жигар, марказий асаб тизими, эндокрин тизим ва ошқозон-ичаклар фаолияти издан чиқади, анемия ривожланади, оқсиллар ва бошқа тўйимли моддаларнинг ҳазмланиши ёмонлашади, ўсиш ва ривожланиш, организм иммунобиологик хусусиятлари пасаяди.