«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Постгеморрагик анемия (Anaemia posthaemorragiea) - қон йўқотилиши туфайли келиб чиқадиган касаллик бўлиб, эритроцитлар сони ва гемоглобин миқдорининг камайиши билан ўтади. Ҳамма турдаги ҳайвонлар касалланади. Кўпинча чўчқа ва гўштхўр ҳайвонлар коннибализм касаллиги пайтида ўзини ўзи тишлаши оқибатида келиб чиқади. Ўткир ва сурункали кечади.
Сабаблари. Ўткир постгеморрагик анемия нисбатан катта қон томирларининг жароҳатланишидан кўп миқдорда ташқи ёки ички қон кетиши оқибатида келиб чиқади. Бунга турли хил жароҳатлар, хирургик муолажалар, ошқозон ва ичаклар яраси пайтида улар деворининг тешилиши, ошқозон олди бўлимларининг дамлаши оқибатида ёрилиши, туғиш пайтида бачадон ва унинг бўйинчасининг ёрилиши ҳамда катта участкаларда геморрагик диатез кузатилиши сабаб бўлади.
Сурункали постгеморрагик анемияларга узоқ муддат нисбатан кичик қон томирлардан қон кетиши, буйрак, сийдик пуфаги касалликлари, ярали-эррозияли гастроэнтерит, қон ишлаб чиқарилишида қатнашувчи витаминлар етишмовчилиги, сурункали геморрагик диатезлар сабаб бўлади.
Геморрагик анемиялар пастериллёз, чўчқалар ўлати, отларнинг юқумли анемияси каби геморрагик диатезлар билан ўтадиган юқумли касалликлар ҳамда аскаридоз, парамфистоматоз, диктиокаулёз каби қон кетиши билан ўтадиган паразитар касалликлар пайтда ҳам кузатилади.
Ривожланиши. Кўп миқдорда қон йўқотилиши ўткир гипоксия, қон босимининг пасайиши ва коллапсга сабаб бўлади. Компенсатор жараён сифатида қон томрларининг торайиши, заҳира қоннинг томирларга ўтиши ҳисобига эритроцитлар ва гемоглобин миқдорининг камайиши деярли сезилмайди. 1-2- суткага келиб уларнинг кескин камайиши кузатилади. Гипоксиянинг кучайиши сабабли қон ишлаб чиқариш кучаяди. Касалликнинг 4-5-суткасига келиб переферик қонда эритроцитларнинг вояга етмаган шакллари: полихроматофиллар, базофил донадор эритроцитлар ва ретикулоцитлар пайдо бўлади. Гипохром характерлаги анемия, лейкоцитоз ҳамда тромбоцитоз ривожланади.
Сурункали постгеморрагик анемия пайтида организмдаги темир заҳираларининг ҳисобига эритроцитлар сони меъёр чегарасида сақланиб турилади, касаллик узоқ давом этганда бу заҳираларнинг камайиб қолиши туфайли эритроцитлларнинг етилиши камаяди, қонда гемоглобинга тўйинмаган эритроцитлар пайдо бўлади. Лейкопения ҳамда лимфоцитоз ривожланади.