«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Белгилари. Клиник белгиларнинг намоён бўлиши кўп жиҳатдан қон кетишнинг давом этиши ва йўқотилган қоннинг миқдорига боғлиқ бўлади. Қисқа вақт ичида жами қон миқдорининг 3 қисмдан кўпроғининг йўқотилиши ҳаёт учун хавфли ҳисобланади.
Ўткир постгеморрагик анемияда коллапс ва гипоксия, уйқусираш, умумий ҳолсизланиш, гандираклаш, қорачиқнинг кенгайиши ва мускулларнинг фибриляр қалтираши, тана ҳароратининг пасайиши, совуқ терлаш, тери ва шиллиқ пардаларнинг оқариши, чўчқа ва итларда қайд қилиш кузатилади. Артериал ва веноз қон босими пасайиб кетади, ҳансираш ва тахикардия ривожланади, пульс тезлашган, паст тўлқинли ва кам тўлишган бўлади, ҳазм тракти моторикаси секинлашиб, сийдик ажратиш актлари сийраклашади. Касалликнинг биринчи кунлари қоннинг умумий ҳажмининг камайишига қарамасдан эритроцитлар, лейкоцитлар сони ва гемоглобин концентрацияси деярли ўзгармайди. Кейинчалик, переферик қонда эритроцитлар сони ва гемоглобин миқдорининг камайиши, вояга етмаган эритроцитларнинг пайдо бўлиши, лейкоцитлар сонининг кўпайиши, қон ёпишқоқлигининг пасайиши ва эритроцитлар чўкиш тезлигининг (ЭЧТ) ортиши характерли бўлади.
Касаллик сурункали тарзда кечганида анемия белгилари аста секинлик билан намоён бўлади. Шиллиқ пардаларнинг оқариши, кучайиб борувчи ҳолсизланиш, доимий уйқусираш кузатилиб, касал ҳайвон кўпинча ётади, ариқлайди, маҳсулдорлик камаяди, ҳансираш, тахикардия, юрак тонларининг пасайиши, функционал эндокардиал шовқинлар, тана ҳароратининг пасайиши, тананинг пастки қисмларида шишлар пайдо бўлиши кузатилади.
Кислород танқислиги туфайли барча аъзо ва тизимлар фаолиятининг издан чиқиши, касал ҳайвон қонида эритроцитлар ва гемоглобин миқдорининг камайиши, қоннинг ранг кўрсатгичининг 1 дан паст бўлиши, анизоцитоз, пойкилоцитоз ва гипохромия кузатилиши сурункали постгеморрагик анемияга хос белгилар ҳисобланади.
Ташхис. Ташқи қон кетиши оқибатидаги постгеморрагик анемияга ташхис қўйишда қийинчилик туғилмайди. Ички қон кетиши оқибатида кузатиладиган анемияларга ташхис қўйишда анамнез маълумотлари, қонни лаборатор текшириш натижалари ҳисобга олинади. Срункали постгеморрагик анемияларни алиментар анемиядан фарқлаш керак. Бунда озиқалар ва қон таркибидаги темир ва В₁₂ витамини миқдорини аниқлаш лозим бўлади.