«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Даволаш. Оғриқ синдромларини йўқотиш учун мускул орасига ёки вена қон томирига 25-50%-ли анальгин эритмаси: отларга 10 мг/кг дозада (25%-ли эритмасидан 10-20 мл, 50%-ли эритмасидан 5-10 мл); вена қон томирига қуйидаги эритмалар: 33%-ли этил спирти (0,5 мл/кг дозада), 0,25%-ли новокаин эритмаси (150-200 мл) юборилади. Пилорик сфенктор ва ичаклар силлиқ мускуллари спазмини йўқотиш мақсадида мускул орасига ёки вена қон томирига но-шпа препарати (отларга – 10-20 мл) инъекция қилинади. Кейин ошқозонга зонд юборилиб, иложи борича газлар ва ошқозон суюқлиги чиқариб юборилади, 4-6 литр 2%-ли борат кислотаси, 1-2%-ли ихтиол, натрий гидрокарбонат, 0,1%-ли калий перманганат каби эритмалар билан ювиш яхши натижа беради. Пилороспазмни йўқотиш мақсадида 15-20 мл хлорид кислотаси ёки 15 мл эритилган сирка кислотаси бир бутилка сув билан зонд ёрдамида ичирилади. Газ ҳосил бўлишини тўхтатиш мақсадида 10-15 г ихтиол ичириш мумкин. 200 мл 10%-ли ош тузи эритмасига 0,2-2,5 г кофеин, 30-40 г глюкоза аралаштириб вена қон томирига юборилади. Санчиқ синдроми йўқотилгач, 25-50 г карловар тузи, шилимшиқли қайнатмалар, кунгабоқар ёғи (250-300 мл), бижғиш жараёнларини тўхтатиб туриш мақсадида антибиотик ва сульфаниламидлар тавсия этилади. Чуқур тозаловчи клизма ўтказилади. Гастрит кузатилмаслиги учун профилактик даволаш ўтказилади.

16-машғулот. ЖИГАР КАСАЛЛИКЛАРИНИНГ ЛАБОРАТОР ДИАГНОСТИКАСИ

Режа:
16.1. Жигарнинг асосий функциялари ва касалликларининг асосий
синдромлари
16.2. Қон зардобида билирубин миқдорини аниқлаш
16.3. Ўткир гепатитни даволаш


Машғулотнинг максади: Студентларга жигарнинг асосий функциялари ва касалликларининг асосий синдромлари тўғрисида тушунча бериш, қон зардобида билирубин миқдорини аниқлаш ва жигар касалликларини даволашни ўргатиш.
Керакли асбоб-ускуна ва жихозлар: Меъёрда ва касалликлар пайтида билирубин алмашинуви ҳақидаги жадваллар, қон зардоби ва унда билирубин миқдорини аниқлаш учун зарур лаборатория жиҳозлари, ўт ҳайдовчи дорилардан намуналар.