Vertebrae ning tanasi, boshi va chuqurasi bo‘ladi. Umurtqa tanasi

Umurtqalar, qovurg‘a va to‘sh suyagini tuzilishi
Bo‘yin umurtqalari – vertebrae cervicales. Barcha qishloq xo‘jalik hayvonlarida 7 ta bo‘yin umurtqalari bo‘lib, o‘zlarining tuzilishlariga ko‘ra ular bir-biridan farq qiladi. O‘rtanchi (3-,4-,5-nchi) bo‘yin umurtqalari birmuncha birbiriga o‘xshash tuzilishga ega. Qolgan bo‘yin umurtqalari, ayniqsa, birinchi va ikkinchilari bir – biridan tubdan farq qiladi
O‘rtangi bo‘yin umurtqalari tekis tuzilishga ega bo‘lib, tanasi kalta, boshi va chuqurchasi yaxshi rivojlangan; elka o‘simtalari oldinga egilgan, uchi yo‘g‘onlashgan.
Ko‘ndalang qovurg‘alar asosida umurtqa arteriyalari uchun ko‘ndalangaro teshigi bo‘ladi.
Hayvonlardagi farq qiluvchi xususiyatlari. Otda - umurtqalar tanasi uzun, boshi va chuqurchasi yaxshi rivojlangan, ko‘ndalang o‘simtalari ikkiga ajralgan –
bittasi (qovurg‘a o‘simtasi) oldinga, ikkinchisi (ko‘ndalang o‘simta) orqaga qaragan, elka o‘simtasi g‘adir-budir bo‘ladi. Cho‘chqada – umurtqalarning tanasi
qisqa, elka o‘simtalari uzun, ventral (pastki) tarog‘i bo‘lmaydi; ko‘ndalang o‘simtalari asosida dorsoventral (yuqori ostki) kanal (nervlar o‘tishi uchun) yotadi;
kaudal va kranial bo‘g‘im o‘simtalari, ko‘ndalang o‘simtalararo teshik yaxshi rivojlangan
Oltinchi bo‘yin umurtqasining ko‘ndalang o‘simtalararo teshigi katta, ventral tarog‘i bo‘lmaydi, elka o‘simtasi boshqa umurtqalarnikiga nisbatan kuchli rivojlangan.
Yettinchi bo‘yin umurtqasining yakka ko‘ndalang o‘simtasi bo‘lib, ko‘ndalang o‘simtalararo teshik bo‘lmaydi. Umurtqa chuqurchasi yonida birinchi qovurg‘a uchun kaudal qovurg‘a chuqurchasi bo‘ladi.
Birinchi bo‘yin umurtqasi – atlant – atlas – halqa shaklidagi ko‘rinishga ega bo‘lib, tuzilishiga ko‘ra boshqa bo‘yin umurtqalaridan farq qilib turadi. U boshni harakatlantirish uchun xizmat qiladi.