Ўқув қулланма Тошкент 2011 йил

3.3. LTE тизими архитектураси

Илгари таъкидлаганимиздек, E-UTRA радиоуланиш технологиясига таянган LTE стандарти сўнги фойдаланувчи ускунасини имкониятларини сезиларли равишда яхшилаш, база ускуналари сиғимини ошириш, жавоб кечикиш вақтини қисқартириш, шу билан бирга тўлиқ мобилликни таъминлаган холда фойдаланувчи итерфейсини янада яхшироқ кўринишга келтириш каби вазифаларни бажаради. IP протоколи барча турдаги трафиклар билан ишлаш имконияти мавжудлиги сабабли кўпчилик операторлар учун оммабоп танлов бўлгани хеч кимга сир эмас. LTE стандарти ҳам хизматлар сифати – QoS ни узлуксиз таъминлаган ҳолда, IP протоколи асосида қурилади. Шу сабабли, овоз трафики асосан “IP орқали овоз” (VoIP ёки VoLTE) ни ташкил этади, бу эса бошқа мультимедия хизматлари билан янада ўзаро мослашишни таъминлайди.

UMTS тизими архитектураси асосида қурилган HSPA технологиясидан фарқли равишда 3GPP лойиҳаси LTE тизими учун икки сатх тармоқларини аниқлаб берди. Бу “Такомиллаштирилган пакетли таянч тармоғи” - EPC (ингл. Evolved Packet Core) номини олган маълумот узатиш таянч тармоғи, ҳамда “Такомиллаштирилган UMTS ер усти радиоуланиш тармоғи” - E-UTRAN (ингл. Evolved UMTS Terrestrial Radio Access Network) номини олган янги радиоуланиш тармоқларидир. Бу тармоқларнинг бажарадиган вазифалари ҳамда уларнинг тузилиши тармоқ элементлари сонини қисқартиришга, уларнинг функцияларини соддалаштиришга, пухтароқ резервлашга йўналтирилган. Энг муҳими, LTE/SAE тармоғи бошқа симли ва симсиз технологиялар билан ўзаро ишлашни ҳамда “хэндовер”ни таъминлаб беради ва бу билан операторлар ва сервис-провайдерларга “узлуксиз мобиллик” хизматларини босқичма-босқич тадбиқ қилиш имконини беради. EPC таянч тармоғи фаолиятини қўллаб қувватловчи таянч нимтизим - EPS (ингл. Evolved Packet Subsystem) деб ном олди.
LTE/SAE тизими архитектутаси бир нечта асосий принциплар асосида қурилади:

• 
  барча технологиялар билан уланиш учун умумий таянч нуқтаси ва шлюзлардан фойдаланиш;
  
• 
  абонент сатхида қулайроқ бўлган архитектурадан фойдаланиш - тармоқ даражаларини сонини қисқартириш (тўрттадан иккитага тушириш - таянч станциялар ва шлюзлар);
  
• 
  барча интерфейслар IP протоколи асосида қурилади;
  
• 
  радиоуланиш ва коммутация функцияларининг ажратилишини W-CDMA/HSPA технологияларидаги каби ташкил қилиш;
  
• 
  бошқарув ва абонент сатхларини мобилликни бошқарув модули ва шлюз орасида бўлиниши;
  
• 
  IP-протокол ёрдамида 3GPP га тааллуқли бўлмаган радиоуланиш технологиялари билан ўзаро ишлаш.
  

Кўриниб турганидек, LTE стандарти олдига функционаллик жиҳатдан бир қатор юқори даражадаги талаблар қўйилган.Улар орасида физик сатҳда ортогонал частотали мультиплекслаш - OFDM, кўп сонли қабул қилиш/кўп сонли узатиш антенна тизимлари - MIMO ҳамда “интеллектли” антенналар каби технологияларни тадбиқ этишлардир. Шундай қилиб, LTE стандарти олдидаги вазифалар анча жиддий ва улар асосан қуйидагилардан иборат: соддалаштирилган инфратузилма ҳамда абонент қурилмаларини яратиш; мавжуд тизимларда ишлатилган радиочастоталар билан бир қаторда, янги частота диапазонларини қулай равишда ўзлаштириш; 3GPP ва 3GPP-2 оилаларига мансуб бўлган бошқа радиоуланиш технологиялари билан ўзаро ишлай олиш.