Умурзоқов, А. Тошбоев

Фермер хўжаликлари фаолиятида қонун ҳужжатларидан фойдаланиш тартиби

Фермер хўжаликларини ташкил этиш, уларнинг фаолияти, қайта ташкил этилиши ва тугатилиши билан боғлиқ муносабатлар «Фермер хўжалиги тўғрисида»ги Қонун ва бошқа қонун ости ҳужжатлари билан тартибга солинади.
Ўзбекистон Республикасининг халқаро шартномасида фермер хўжалиги тўғрисидаги Ўзбекистон Республикаси қонун ҳужжатларида назарда тутилганидан бошқа қоидалар белгиланган бўлса, халқаро шартнома қоидалари қўлланилади.
Ер билан боғлиқ бўлган барча муносабатларда Ўзбекистон Республикасининг «Ер кодекси»дан фойдаланилади. «Ер кодекси»нинг асосий принциплари қуйидагилар: энг муҳим табиий ресурс, қишлоқ хўжалигининг асоси тариқасида ер фондини асраш, тупроқ сифатини яхшилаш ҳамда унинг унумдорлигини ошириш; ерлардан оқилона, самарали ва белгиланган мақсадда фойдаланишни таъминлаш; қишлоқ хўжалиги учун мўлжалланган ерларнинг, энг аввало, суғориладиган ерларнинг алоҳида муҳофаза этилишини, кенгайтириб боришнинг ҳамда улардан қатъий белгиланган мақсадда фойдаланишни таъминлаш; қишлоқ хўжалиги ерларининг унумдорлигини ошириш, ерларнинг мелиоратив ҳолатини яхшилаш ҳамда ерларни муҳофаза қилиш тадбирларини амалга оширишни давлат йўли билан ва бошқа тарзда қўллаб- қувватлаш; ерга ва табиий муҳитга зарар етказилишининг олдини олиш, экологик хавфсизликни таъминлаш; ерга эгалик қилиш ва ундан фойдаланиш шаклларининг хилма-хиллиги, ер муносабатлари иштирокчиларининг тенг ҳуқуқлигини таъминлаш ҳамда уларнинг қонуний ҳуқуқ ва манфаатларини ҳимоя этиш; ердан фойдаланганлик учун ҳақ тўлаш; ерларнинг ҳолати ҳақидаги ахборотнинг тўлиқ бўлишини ҳамда ундан эркин фойдаланишга йўл қўйилишини таъминлаш.
Умуман, «Ер кодекси»да юқоридаги принциплардан келиб чиққан ҳолда, фермер хўжалигининг ер билан бўладиган барча муносабатлари аниқ кўрсатиб берилган.
Фермер ўз фаолиятида «Ер кодекси»дан ва меъёрий ҳужжатлар тўпламидан фойдаланиши мақсадга мувофиқ. Бу ҳужжатлардан фойдаланиш тартиблари Вазирлар Маҳкамасининг Қарори ва Ўзбекистон Адлия вазирлиги томонидан ишлаб чиқилади.
Фермер ўзининг иш фаолиятини, “Фермер хўжалиги тўғрисида”ги Қонун бўйича амалга оширади.