Ulıwma orta bilim beriw mektepleriniń 7-klası ushın sabaqlıq

Tapsırma 1.3.
1. «Úsh hárip» degende neni túsindińiz?
2. Qızıl menen berilgen turaqlı sózlerdi hám jay sóz dizbeklerin sinonim 
formaları menen almastırıń.
3. Ǵarrı ne ushın qapa boldı?
4. Ǵarrınıń kelini durıs islegen be?
Ǵarrı búgin sol aqlıǵınıń awırıp atırǵanın esitip, ne qıların bilmey jolǵa shıqtı. 
Adamlardıń siltewi menen biraz jerge kelip, aqlıǵınıń qay jerde ekenligin bilmey tursa, 
bir jigit aqlıǵınıń qay jerde jatırǵanın anıqlap, qolınan jetelep ákeldi. 
Tamshı dári salıp qoyǵan aqlıǵı tap atasın kútip otırǵanday, esikke qarap jatır 
eken. Bir nárse dep sóylengendey boldı.
– Ne deyseń, balam?
– Mashın
– Ya, ne deyseń balam, ash boldıń ba?
– Ózi júretuǵın... 
Áste ólpeń
ǵana esitilgen balanıń dawısın ǵarrı esitpegen menen qızı da, ǵarrını 
ákelgen jigit te esitti. Qızı bolsa ákesin qısındırmayın dep gápti basqa jaqqa burıp jiberdi:
– Ne deydi, bir nárse jeymen dey me?
– Yaǵaw, aǵa suw ishejaq. Ǵarrı:
– Qızım, asıǵıp júrip hesh nárse ákele almadım, – dedi.
– Yaǵaw, aǵa, qońsılar, qurdaslar bári kelip atır, qısınba, bári bar, aǵa.
– Erteń kelemen, onda... Aqlıǵınıń mańlayınan qayta-qayta súyip, basınan 
sıypalap, qızı menen xoshlasıp shıǵıp ketti.

---

103
 
Tapsırma 1.4.
1. Abzactaǵı dialogtı oqıń. Bul dialogta kishkene bala atası menen durıs 
sáwbet qurdı ma?
2. Mashina alıp kelmewiniń sebebin aytıwda ǵarrı haqıyqattı ayttı ma?
3. Qız balasınıń aytqan gápin esitse de ne ushın ózin esitpegenge aldı?
4. Tekstte ne ushın «mashina» emes «mashın» sózin sóylewshi 
paydalanǵan?
5. Abzacta qanday janapaylar qollanılǵan?
Tańda turıp, basqalar oyanıp ketpesin dep, áste-aqırın, qazan-tabaqtı tıqırlatpay 
sút góje pisirdi de, úyden tez-tez shıǵıp ketti. Emlewxanaǵa qarap piyada júrip otırdı. 
Keshe kelgen soń, aqlıǵı jatırǵan palataǵa tuwrı kirip bardı. Ayaǵına bir nárse tiygenin 
sezip tómenge qarasa, oyınshıq mashın «aldımnan shıq» degendey qayta-qayta 
gewishin ójetlenip dúgedi. Ómiri dawamında bunday oyınshıqtı kórmegen ǵarrı ań-tań 
bolıp tursa, kátte otırǵan aqlıǵı ishek-silesi qatıp, kúlip atır:
– Ata, raxmet! – dedi taqıldap.
– ???
– Ózi júretuǵın mashina ápergenińizge raxmet ata, keshe siz benen kelgen ájaǵa
ákelip berdi. Mine, qutısı da bar. Mazalı zatlar da ákeldi, kóp etip, atań berip jiberdi dedi.