Ulıwma orta bilim beriw mektepleriniń 7-klası ushın sabaqlıq

190
Tapsırma 1.4.
1. Kóp partiyalıqtıń qanday unamlı tárepleri bar?
2. Deputatlar qanday jumıs alıp baradı? 
Senat aǵzaları (senatorlar) Qaraqalpaqstan Respublikası Joqarǵı Keńesi, 
wálayatlar, rayonlar hám qalalar, mámleketlik hákimiyatı wákillik organları 
deputatlarınıń tiyisli qospa májilislerinde deputatlar arasınan jasırın dawıs beriw jolı 
menen Qaraqalpaqstan Respublikası, wálayatlar hám Tashkent qalasınan teń muǵdarda 
– altı adamnan saylanadı. 
Senattıń on altı aǵzası pán, kórkem óner, ádebiyat, islep shıǵarıw tarawında, 
sonday-aq, mámleket hám jámiyet iskerliginiń basqa tarmaqlarında úlken ámeliy 
tájiriybege iye bolǵan, óz aldına xızmet kórsetken eń abıraylı puqaralar arasınan 
Ózbekstan Respublikası Prezidenti tárepinen tayınlanadı. 
Senattıń jumısı onıń jalpı májilisleri hám onıń bólim májilislerine jıynalatuǵın 
senatorlar iskerligine tiykarlanadı.
Tapsırma 1.5.
1. Senator hám deputatlardıń tayınlanıwı hám jumıs alıp barıwındaǵı 
ózgesheliklerdi bilesiz be? 
2. Senatorlar ne sebep hár qıylı taraw qánigelerinen tayınlanadı dep 
oylaysız? 
Parlament tariyxı ásirler menen ólshenedi. Zamanlar ózgeriwi menen 
parlamentlerdiń roli de izshil ózgerip, onıń mazmunı jańa ideyalar, tájiriybeler menen 
bayıp barmaqta.
Parlamentarizm ideyası birinshi mıń jıllıqta Rimde, Angliya hám Ispaniyada xalıq 
májilisleri formasında júzege kelgen bolıp, bunnan soń mámleket májilisi dárejesine 
kóterilgenge shekem jáne birqansha rawajlanıw basqıshlarınan ótken. Sol tárizde 
parlament mámleketlik institut sıpatında uzaq tariyxtı basıp ótken. Parlamentler 
jámiyetlik turmısta oraylıq orındı tutadı.
Tapsırma 1.6.
1. Parlament neniń tiykarında payda 
bolǵan?
2. Parlamenttiń qáliplesiw tariyxı 
haqqında nelerdi bilip aldıńız?