Uglevodorodlar tarkibi ikkitagina elementlardan uglerod va vodorod atomlaridan tashkil topgan organik birikmalar uglevodorodlar deb ataladi

6) Uglerod (II) oksidni katalitik gidrogenlash reaksiyasi bo’yicha n-alkanlarni olish (Fisher-Tropsh sintezi). Uglerod (II) oksid va vodorod aralashmasini temir yoki kobalt katalizatori ustidan 180-300^o haroratda o’tkazilganda tarkibida 6-10tacha uglerod atomlari saqlagan normal tuzilishli alkanlar aralashmasi hosil bo’ladi.

Fisher-Tropsh sintezidan sanoatda sintetik benzin va alohida uglevodorodlar olish uchun foydalaniladi.

Kimyoviy xossalari
Alkanlarning kimyoviy xossalari ular tarkibidagi bog’larning tabiatiga bog’lik. Alkanlar tarkibidagi barcha uglerod atomlari sp³-gibridlangan holatda bo’lib, ular o’zaro va vodorod atomlari bilan oddiy σ-bog’ orqali bog’langan.

Alkanlarning oddiy sharoitda reaksion qobiliyati past bo’lib, ularga kislota, ishqorlar hamda oksidlovchilar ta’sir etmaydi. Bu hodisa C−C va H−C bog’larining mustahkamligi bilan izohlanadi. sp³-Gibridlangan uglerod atomlarining elektromanfiyligi (2,5) vodorod atomning elektromanfiyligidan (2,1) uncha farq qilmagani uchun alkanlardagi C−H, C−C bog’lar qutbsiz kovalent bo’lib, geterolitik uzilishiga moyil emas, lekin ma’lum bir sharoitlarda C−C va C−H bog’lari gomolitik uzilishi mumkin.

Shuning uchun alkanlar uchun: 1) C−H bog’ining uzilishi bilan (galogenlash, nitrolash, sulfolash, sulfoxlorlash reaksiyalari) va 2) C−C bog’ining uzilishi bilan boradigan reaksiyalar (oksidlanish, parchalanish reaksiyalari) xos.