Turizm va mehmonxona xo’jaligi” kafedrasi o’zbekiston iqtisodiyoti fani bo’yichA

9.3. Milliy sanoatning rivojlanish bosqichlari

O‘zbekiston iqtisodiyotida tabiiy xomashyo, mehnat, moddiy-texnik, iqtisodiy, moliyaviy va innovatsion imkoniyatlardan unumli foydalanishga yo‘naltirilgan tub islohotlar amalga oshirilmoqda. Bu bevosita sanoat ishlab chiqarishida resurslar va turli salohiyatlarning mujassamlashtirilishida ham namoyon bo‘lmoqda. Sohada xo‘jalik-iqtisodiy, tashkiliy, institutsional, mulkiy va huquqiy islohotlar amalga oshirildi. Bu islohotlarning asosiy yo‘nalishlari quyidagilar:

– sanoat korxonalarini davlat tasarrufidan chiqarish va xususiylashtirish;

– davlat aksiyadorlik, korporativ, jamoa, xususiy mulk shakllarining amal qilishini ta’minlash;

– sanoat tarmoqlarida tarkibiy o‘zgarishlarni amalga oshirish;

– kichik biznes va xususiy tadbirkorlikning jadal rivojlanishini ta’minlash;

– xorijiy kapitalning sohaga kirib kelishini va samarali faoliyatini kafolatlash;

– texnik va texnologik yangilash, modernizatsiya, diversifikatsiya ishlarini jadallashtirish va boshqalar.

O‘zbekiston sanoatida tarmoqlar turli darajada ahamiyatga ega va ularning roli oshib bormoqda. Milliy sanoatning shakllanishi va rivojlanishi mavjud tabiiy xomashyo va mehnat resurslariga tayanadi. Sanoatlashuv jarayoni va sanoat taraqqiyoti masalalariga zamonaviy yondashuvlar ishlab chiqilmoqda. Bugungi kunda bozor iqtisodiyotining asosiy uch subyekti – davlat, korxonalar va uy xo‘jaliklarining sanoat mahsulotlariga bo‘lgan ehtiyojlari borgan sari to‘laroq qondirilmoqda.

Milliy sanoat rivojlanishi tadrijiy mazmun kasb etmoqda. Shu sababli bu jarayonni shartli ravishda bosqichlarga ajratib o‘rganish maqsadga muvofiq.