Turizm va mehmonxona xo’jaligi” kafedrasi o’zbekiston iqtisodiyoti fani bo’yichA

Qisqacha xulosalar

1. O‘zbekiston dunyoda yalpi iqtisodiy salohiyati yuqori mamlakatlardan biri hisoblanadi. Mamlakat, ayniqsa, demografik, tabiiy resurslarga boy. Bu yerda mineral xomashyo resurslari zaxiralari, yer va suv resurslari joylashgan.

2. O‘zbekiston aholisi tez o‘sayotgan faol demografik mamlakatlar qatoriga kiradi. Mamlakatda olib borilayotgan faol ijtimoiy va demografik siyosat tinch-totuvlik, oila munosabatlarining mustahkamligi, tarixiy milliy an’analar, qadriyatlar, ular barobarida kechayotgan nikohning yuqori, ajralishning past darajasi, tug‘ilishning yuqoriligi va o‘limning, ayniqsa, bir yoshgacha bo‘lgan go‘daklar o‘limining kamayishi, salomatlik, sog‘lom avlod, mustahkam oila, qariyalarni e’zozlash dasturlarining qabul qilinishi va amalga oshirilishi aholi tabiiy o‘sishini ta’minlamoqda.

3. Aholining tabiiy o‘sishi mamlakatning barcha hududlarida kuzatilmoqda. Shu bilan birga uning sur’atlari shaharga nisbatan qishloqlarda yuqoriroq. Bu tendensiyaning asosiy sababi shaharda qishloqqa nisbatan nikoh darajasining pastligi, ajralish darajasining yuqoriligi, umumiy, turmush va sanitariya madaniyatidagi farq hisoblanadi. Bundan tashqari, qishloqda asosan o‘zbek millatiga mansub aholi yashaydi. Ular an’anaviy oilaparvar, bolajon xalq.

4. Aholi, mehnat resurslari va bandlik o‘rtasida mustahkam bog‘liqlik bo‘lishi kerak. Aks holda ijtimoiy muammolar kelib chiqishi mumkin. Buning uchun esa, ish o‘rinlarini yaratishni kuchaytirish, iqtisodiyot tarmoqlari o‘rtasida mehnat resurslarini qayta taqsimlash chora-tadbirlarini hamisha ko‘rib borish lozim. Hozirgi paytda mehnat resurslarining chorak qismi qishloq va o‘rmon xo‘jaligida band bo‘lib, ular asosan past malakali ish bilan band. Qishloq ayollari o‘rtasida bandlik darajasi past. Bu, o‘z navbatida, oila daromadlari darajasiga salbiy ta’sir ko‘rsatmoqda.

5. Bizga har qanday bandlik kerak emas. Bandlikni ta’minlash pirovard maqsad ham bo‘lmasligi kerak. Bizga samarali bandlik, ya’ni yaxshi daromad keltiradigan, yuqori bilim talab qiladigan, zamonaviy texnika va texnologiya bilan ishlaydigan bandlik kerak.