Turizm va mehmonxona xo’jaligi” kafedrasi o’zbekiston iqtisodiyoti fani bo’yichA

Farg‘ona iqtisodiy rayoni ma’muriy jihatdan Farg‘ona, Andijon va Namangan viloyatlarini o‘z ichiga oladi. Maydoni 19,2 ming kv. km ga teng bo‘lib, bu respublika hududining 4,3 foizini tashkil etadi. 2017-yil boshida iqtisodiy rayonda 9179,7 ming kishi istiqomat qilib, bu mamlakat aholisi­ning 28,6 foizini tashkil etadi.

Farg‘ona iqtisodiy rayonida yer-suv va mineral xomashyo resurslari g‘oyat cheklangan, ammo mintaqa mehnat resurslariga boy va mamlakat aholisining eng zich joylashgan hududi hisoblanadi. Rayonni rivojlantirishning asosiy yo‘nalishi mavjud qishloq xo‘jaligi resurslari xomashyosi (paxta, meva, sabzavot, pilla)ga mo‘ljallangan mehnattalab ishlab chiqarish tuzilmasini barpo etishdan iborat. Qishloq xo‘jaligi asosan paxtachilikka ixtisoslashgan (yalpi paxta hosilining 26 foizi). Rayonda ipakchilik, kimyo sanoati (mineral o‘g‘itlar ishlab chiqarish), neftni qayta ishlash (Farg‘ona, Oltiariq), butun Markaziy Osiyoda yagona bo‘lgan yengil avtomobil ishlab chiqaradigan «GM-Uzbekistan» qo‘shma korxonasi muhim ahamiyatga egadir.

2016-yilda Farg‘ona iqtisodiy rayonida O‘zbekistonda ishlab chiqarilgan YIM hajmining 17,1 foizi, sanoat mahsuloti hajmining 17,4 foizini ishlab chiqardi va bu ko‘rsatkichlar bo‘yicha Toshkent iqtisodiy rayonidan keyin ikkinchi o‘rinda turadi. Yalpi qishloq xo‘jaligi mahsulotidagi salmog‘i 26,6 foizga teng. Bu ko‘rsatkich bo‘yicha esa iqtisodiy rayonlar orasida birinchi o‘rinni egallaydi. Shuningdek, 2016-yilda mintaqaga chakana savdo aylanma hajmining 22,4 foizi, ishlab chiqarilgan iste’mol mollarining 22,9 foizi, qurilish ishlarining 16,5 foizi, asosiy kapitalga kiritilgan investitsiyalarning 14,0 foizi, iqtisodiyotda band bo‘lganlarning 28,3 foizi hamda respublika tashqi savdo aylanmasining 12,7 foizi to‘g‘ri keldi.