Т/р спорт турлари номи тавсифи

Стол тенниси
Стол тенниси — кичик копток ва ракеткалар билан столда ўйналадиган спорт ўйини. Шарқий Осиёда пайдо бўлган. 20-асрнинг 20-йилларидан кўп мамлакатларга тарқалган. Дастлаб «пинг-понг» (франтсузча пингпонг -коптокнинг ракетка ва столга урилишида чиқадиган овоз) деб аталган. Стол тенниси учун, одатда, стол ўлчами 152,5х274,3 см; баландлиги 76 см; тури 183х 15,25 см бўлади. Ёғоч ракетканинг юзига резина пластина қопланади. Копток оқ пластикадан ясалади, диаметри 37,2—38,2 мм, оғирлиги 2,4 - 2,53 г. Ўйин майдончасининг ўлчами 6-7х12-14 м. Расмий мусобақалар спорт залларида ўтказилади: эркаклар ва аёллар - жамоа бўлиб, якка ҳолда ва жуфтликда ҳамда аралаш жуфтликда мусобақалашадилар. Ўйин 3 ёки 5 партиядан ўйналади. Ўйинчилардан бири 21 очко тўпласа, у ғолиб ҳисобланади. Агар ҳисоб 20:20 бўлиб қолса, унда ўйинчилардан бири 2 очко ортиқ тўплагунча ўйин давом эттирилади. Стол тенниси Халқаро федератсияси (ИТТФ, 1926 йил ташкил этилган) 130 дан ортиқ миллий федератсияни бирлаштиради. 1926 йилдан ҳар 2 йилда жаҳон биринчилиги ўтказилади, 1988 йилдан Олимпиада ўйинлари дастурига киритилган. Ўзбекистонда Стол тенниси кенг оммалашган. Ўзбекистон чемпионати ва кубоги мусобақалари мунтазам ўтказиб турилади. Ўзбекистон Стол тенниси федератсияси 1993 йил ИТТФга аъзо бўлиб кирган.
28	Сув полоси	Сув полоси, ватерполо — сувда, яъни тўғри бурчакли ҳовуз (30х20 м, чуқурлиги камида 1,8 м)да тўп билан жамоа бўлиб ўйналадиган спорт ўйини. Ҳар жамоада 7 тадан ўйинчи қатнашади. Ҳовузга 3х0,9 м лик 2 та дарвоза ўрнатилади. Ўйиннинг мақсади — рақиб дарвозасига иложи борича кўп тўп тушириш. Сув полоси тўпининг айланаси 68 - 71 см, оғирлиги 400 - 450 гр. 1967 йилдан бошлаб пластмасса тўп билан ўйналади. Қоидага кўра, мусобақа соф ўйин вақти 5 минутдан бўлган 4 босқичда 2 минутлик танаффус билан ўтказилади. Ҳар қандай усулда сузиш, тўпни 1 қўлда олиб юриш ва отиш мумкин (фақат дарвозабонгина 2 қўлида ўйнайди), қўлида тўп бўлмаган рақибга ҳужум қилиш ман этилади. Қоидани бузганлик тўпни ўйинга киритиш ҳуқуқини рақибга бериш, ўйиндан чиқариб юбориш (45 секунд ёки дарвоза ишғол қилингунга қадар) билан жазоланади. Ўйиннинг дастлабки қоидаларини шотландиялик В.Уилсон ишлаб чиққан (1876). 19-аср охири — 20-аср бошларидан Сув полоси Европа мамлакатларида оммалаша бошлади. 1926 йил Халқаро ҳаваскорлар сузиш федератсияси (ФИНА) ҳузуридаги Сув полоси қўмитаси тузилган. 1973 йилдан жаҳон чемпионати мусобақалари ўтказилади. 1900 йилдан Олимпиада ўйинлари дастурига киритилган. Ўзбекистонда Сув полоси ўйинлари 1946 йилдан уюштирила бошлаган. Мамлакатимизда «Меҳнат», «Локомотив», «Спартак», «Ёшлик» ва бошқа жамоалар бор. Ўзбекистан Сув полоси федератсияси 1993 йил ташкил этилган. Эркин Шагайев спортнинг шу тури бўйича олимпиада чемпионидир.
29