Тошкент Тиббиёт Академияси

Қўлланилиши: ГБ (хафақонлик) ва унинг ҳуружларида (криз). Препарат қўллашни тўхтатиш аста-секин амалга оширилади, чунки бекор қилиш синдроми ривожланади (уйқусизлик, гипертензив криз).
МЕТИЛДОФА – организмда α-метилнорадреналинга айланади, у эса клофелинга ўхшаб МНСдаги α-адренорецепторларни қўзғатади ва қон босимини бошқаришда иштирок этувчи нейронлар фаоллигини сусайтиради. Метилдофа МНСга тинчлантирувчи таъсир кўрсатади ва уйқу чақиради. МИТдан ичилганда, препаратнинг 50%гачаси сўрилади. Гипотензив таъсири 4-5соатдан сўнг бошланиб, бир суткагача давом этади. Оғир ҳолларда метилдофани томир орқали киритиш мумкин. Одатда метилдофани беморлар яхши қабул қиладилар, лекин баъзан депрессия, паркинсонизм, диспепсия, оғиз қуриши каби нохуш таъсирлар ривожланиши мумкин. Камдан-кам ҳолларда агранулоцитоз, тромбоцитопения, гемолитик анемия бўлади.
АПРЕССИН – диазоксид ва миноксидилга ўхшаб, асосан резистив томирларни (артериолаларни) ва майда артерияларни кенгайтирувчи воситаларга киради. Препарат периферик томирларнинг умумий қаршилигини ва қон босимини пасайтиради. Препарат рефлектор тахикардия чақиради. МИТдан яхши сўрилади. Таъсир кучи 1 соатдан кейин энг юқори бўлади. Сўрилган апрессинни 80-90% оқсиллар билан боғланади. Организмда ацетилланади.
Нохуш таъсири: диспепсия, ревматоид артрит ва қизил бўрича каби ўзгаришлар.
ДИАЗОКСИД – препарат артериолалар тонусини туширади. Юрак ишини сусайтиради. Томирга киритилгандан кейин тез ва кучли даражада қон босимини туширади. Таъсири 12-18соат давом этади. Хафақонлик хасталиги ҳуружини бартараф этишда қўлланилади.
Нохуш таъсири: Nа⁺ионларини ва сувни организмдан чиқарилишини сусайтиради. Гипергликемия, гиперурекимия ривожлантиради.
МИНОКСИДИЛ – диазоксидга ўхшаб, томирларнинг силлиқ мушаклари калий каналларининг агонисти хисобланади. Веналарга кам таъсир этади. Периферик томирларнинг умумий қаршилигини камайтиради, тахикардия ва юракнинг минутлик ҳажмини оширади. МИТдан яхши сўрилади (90%), кўп қисми (90%) жигарда парчаланиб, ўзига нисбатан фармакологик фаол метаболитлар ҳосил бўлади. Таъсири 30 минутдан кейин бошланади. Метаболитлари асосан (97%) пешоб билан чиқади(24- 48 баъзан 75соат). Плацентадан ўтади.