Амалий машғулот мацсади: Талабаларда биокимёвий усулнинг моҳияти, уни ўтказиш босқичлари ва ахамияти тўғрисидаги билимларни шакллантириш.
Мустақил тайёрланиш учун топшириқлар. I. Мавзу бўйича берилган материални ўрганиш ва қуйидаги саволларга жавоб бериш: 1. Биокимёвий усулнинг моҳиятини тушунтиринг.
2. Биокимёвий усул ёрдамида тахлил қилишнинг асосий босқичлари қандай?
3. Биокимёвий усулни қўллаш билан ташхислаш ўтказилувчи ирсий касалликларни кўрсатинг.
4. Қандай туғма касалилкларни ташхислаш учун биокимёвий тахлил ўтказишга кўрсатма берилади?
5. Тиббий генетикада қўлланилувчи биокимёвий тахлил турлари.
6. Фенилкетонурияда қандай биокимёвий бузилишлар юзага келади?
7. Галактоземияда қандай биокимёвий бузилишлар юзага келади?
8. Тея-Сакс касаллигида қандай биокимёвий бузилишлар юзага келади?
9. Гемоглобинопатияда қандай биокимёвий бузилишлар юзага келади?
10. Ирсий касалилкларни олдини олишда биокимёвий усулнинг аҳамиятини тушунтиринг.
II. Вазиятли масалаларни ечинг ва тест саволларига жавоб беринг. Ўқув ашёлар.Пробиркалар билан штатив, ўзгарувчан хажмли пипеткалар, плитка, сув ҳаммоми, рН метр, магнитли аралаштиргич, иссиқллиққа чидамли колба ва ўлчов стаканлари, лаборатор тарози.
Биокимёвий тахлил ўтказиш баённомалари 1. Фенилкетонурияни ташхислашда фенилпируватни аниқлаш (Фелинг синамаси). Фенилаланин алмаштириб бўлмайдиган аминокислотага мансуб бўлиб, у ҳайвонлар организми ушбу аминокислотанинг бензол халқасини синтезлашга қодир эмас. Уни тирозинга айланишини хар қандай турдаги бузилишида фенилкетонурия келиб чиқади (1-расм).
1-расм. Фенилкетонурияда фенилаланиннинг ўзгариши.
Фенилкетонуриянинг 1 тури энг ўп тарқалган аминоацидопатия хисоб-ланади. Оммавий скрининг маълумотларига кўра турли мамлакатларда ушбу патологиянинг учраш даражаси ўртача 1:10000 ни ташкил этади, бироқ бу кўрсаткич популяцияга боғлиқ равишда ўзгарувчандир: Ирландияда 1:4560, Японияда 1:100000 гача. Касаллик аутосом-рецессив равишда наслдан-наслга ўтади ва фенилаланинни тирозинга айланишини таъминловчи фенилаланин-4-монооксигеназа ферменти фаоллигини сусайиши билан кечувчи мутация билан боғлиқ. Фермент фақат жигар, буйрак ва меъда ости безида мавжуд.
Фенилкетонуриянинг 2 тури эса дигидробиоптеринредуктаза ферментининг аутосом-рецессив нуқсони билан боғлиқ. Фермент етишмовчилиги натижасида фенилаланин ва триптофан гидроксилазаси кофактори сифатида иштирок этувчи тетрагидробиоптериннинг фаол шаклини қайтарилиши бузилади. Бунинг натижасида фенилаланинни тирозинга, триптофанни 5-гидрокситриптофанга айланиши бузилади.
Фенилкетонуриянинг 3 тури аутосом-рецессив тарзда наслдан-наслга ўтади ва дигидронеоптерин-учфосфатдан тетрагидробиоптерин синтезланиш жараёнида иштирок этувчи 6-пирувоил-тетрагидроптеринсинтазанинг етишмовчилиги билан боғлиқ.
Фенилкетонурия патогенезида қатор ҳолатлар аҳамиятли, жумладан:
бемор организми тўқима ва суюқликларида кўп миқдорда фенилаланин ва унинг унумларини (фенилпироузум, фенилсут, фенилсирка, гиппур кислотаси, фенилэтиламин, фенилацетилглютамин) тўпланиши ва улар антижасида ацидоз келиб чиқиши.
кўрсатилган моддаларни марказий асаб тизимига бевосита заҳарли таъсир этиши оқибатида қатор ферментларни, жумладан пируваткиназа (глюкозани оксидланиши) тирозиназа (меланин синтези), тирозин-гидроксилаза (катехоламинлар синтези) ва моноамин нейромедиаторлар – тирамин, октопаминлар синтезини бузилиши.
серотонин синтезини бузилиши, чунки фенилаланин-4-моноокси-геназа бир вақтни ўзида триптофанни серотонин ўтмишдоши 5-гидрок-ситриптофанга айланишини таъминлайди.
фенилаланин томонидан ароматик аминокислоталар – триптофан ва тирозинни ҳужайрага транспортини рақобатли сусайтириши.
тўқималарда оддий ва мураккаб оқсиллари синтезини бузилиши, натижада аксарият беморларда миянинг оғир шикатланиши ва жигар функциясини бузилиши кузатилади.
Фенилкетонурияни ташхислаш ярим миқдорий тест ёки қонда фенилаланинни аниқлаш орқали амалга оширилади. Даволанмаган ҳолатларда сийдикда фенилаланинни парчаланиш маҳсулотлари (фенилкетонлар) аниқлаш мумкин (чақалоқ хайтининг 10-12 кунларида). Бундан ташқари жигар биоптатида фенилаланингидроксилаза ферменти фаоллигини аниқлаш ва фенилаланингидроксилаза генида мутацияларни излаш орқали амалга оширилади.
Фенилкетонурияни эрта ташхислаш учун Фелинг синамаси қўлланилади. Қонда фенилаланин миқдорини юқори бўлишида Фелинг синамасининг мусбат бўлиши кузатилади. Синама носпецифик саналади, гистидинемия, алкоптонурия, хамда баъзи дори воситаларини (аминазин, фосфат кислота тузлари) қабул қилишда хам ёлғон ижобий натижа беради. Бундан ташқари Фелинг синамаси 2-5 хафталик болаларнинг барчасида ижобий бўлади. Шунинг учун Фелинг синамасининг ижобий бўлиши – бу фақат кейинги текширувлар учун асос бўлиб хизмат қилади.
