Тошкент шаҳар “баркамол авлод” болалар маркази “юмшоқ Ўйинчоқлар”

ТОШКЕНТ ШАҲАР “БАРКАМОЛ АВЛОД”
БОЛАЛАР МАРКАЗИ
“ЮМШОҚ ЎЙИНЧОҚЛАР”


/Мактаб, “Баркамол авлод” болалар марказларининг
бадиий ижодиёт йўналиши тўгарак раҳбарларига услубий тавсиянома /






ТОШКЕНТ-2016

Муаллиф:

З.Т.Атабаева - Тошкент шаҳар “Баркамол авлод” болалар марказининг бадиий ижодиёт йўналишидаги тўгараклар услубчиси.

Ушбу тавсиянома ТШБАБМ Услубий Кенгашининг 2016 йил 23 декабрдаги 2-сонли йиғилишида кўриб чиқилди ва тасдиқланди


Кириш
Ўйинчоқлар – болалар ўйинлари учун яратилган махсус предметдир. Бироқ бу реал предметнинг кичрайтирилган нусхаси эмас, балки унинг шартли тасвири, ўта умумлаштирилган бадиий образидир. Ифодали шакл, ҳаракатлилик, равшанлик ва рангнинг шартлилиги – буларнинг барчаси болаларни ўйинчоққа жалб қилади. У билан ўйнаш иштиёқини туғдиради, бир сўз билан айтганда, ўйинчоқ бола қувончининг манбаидир.
Юмшоқ ўйинчоқ билан турли ёшдаги болалар шуғулланишлари мумкин. Мактабгача ёшдаги болаларнинг юмшоқ ўйинчоқлари улар ўйинларининг қизиқарли ўтишига восита бўлса, катта ёшдаги болаларнинг ясаганларини эса уйни безатиб қўйишга, туғилган кунларга, байрамларда дўстларга, боғчаларга, мактабларнинг куни узайтирилган гуруҳларига, меҳрибонлик уйларига совға ўрнида бериш учун ишлатишади.
Юмшоқ ўйинчоқларни тайёрлаш санъати қадимги халқ амалий санъатининг турларидан бири ҳисобланади. Ўйинчоқларни тайёрлаш халқларнинг урф-одатлари ва шарт-шароитларини ҳисобга олган ҳолда амалга оширилган. Масалан, юмшоқ ўйинчоқлар ўрмонга бой ҳудудларда дарахтлардан, соз тупроқли ерларда лойдан, пахта экиладиган жойларда эса турли-хил газламалардан тайёрланган.
Юмшоқ ўйинчоқни ясашни, унинг ясаш технологияси услубини тайёр шаблон асосида бошлаш мумкин. Ўйинчоқ андоза асосида тайёрланишига қараб, ўқувчиларнинг интилишларини, ғояларини рағбатлантириши керак. Ўйинчоқ тайёрлашнинг бошланғич поғонасидаёқ ўқувчиларга маълум бир ғояларни амалга оширишни ўргатиши керак. Шундагина ўзлари қизиқарли ўйинчоқни тайёрлай оладилар. Тўгарак аъзолари тайёр андозалардан ҳам ўзлари янги ўйинчоқ моделини яратишлари мумкин.
“Юмшоқ ўйинчоқлар” тўгарагида ўқувчи-ёшларни ўйинчоқлар дунёси билан таништириш, уларни турли хил ўйинчоқ намуналарини ясаш кўникмалари ҳосил қилиш, ўйинчоқларни тўғри ясаш, хом-ашёлар, рангларни тўғри танлай олишга ўргатилади.