Тошкент шаҳар “баркамол авлод” болалар маркази “юмшоқ Ўйинчоқлар”

Андозаларни тайёрлаш.
Ўйинчоқ тайёрлашда, энг аввало, картондан андоза тайёрланади. Бичишдан аввал андозани калка қоғозига тушуриб қирқиб оламиз. Сўнгра қалинроқ қоғозга ёки картонга, керакли ўлчамга ўтказилади. (Андоза ўлчамини ўзгартириш мавзусига қаранг). Андоза деталларини жойлаштиришда бир-бирига жуда яқин қўймаслик керак. Ҳар бир тайёр деталга номи ва неча дона бичиш кераклиги ёзиб кўрсатилади. Масалан, тана қисми – 2 дона, қулоқ – 4 дона. Ҳар бир ўйинчоқ модели андозаси алоҳида конвертларда сақланиши лозим. Андозалар қийшайиб ва букланиб қолмаслиги учун конверт ҳажми андоза ҳажми билан бир бўлиши керак, конверт устига ўйинчоқ номи ёзиб қўйилади. Ўйинчоқнинг сифатли чиқиши моделнинг ҳар бир детал андозаси тўғрилигига боғлиқ бўлишини ёдда тутиш лозим.


Газламани бичиш.
Андоза газламанинг тескари томонига жойлаштирилади ва бўр (совун, қалам) да эҳтиёткорлик билан нечта бичиш лозим бўлса, шунча чизиб чиқилади. Жуфт деталлар доимо “кўзгу” қоидаси бўйича бичилишини унутмаслик керак. Тукли, мўйнали газламаларнинг тук йўналишини андозада кўрсатилган стрелка йўналиши билан бир хил бўлишига алоҳида эътибор берилади. Мўйнадан тикилган ўйинчоқ деталлари, асосан, мўйна қолдиқларидан ва лахтак бўлакларидан бичилади.Андоза деталларини бичишда энг аввал катта деталлар жойлаштирилади. Мўйна бўлагининг биттасига андоза сиғмаса, уларнинг толавий таркиби, тузилиши, ранги ва туклари йўналиши бўйича тўғрилаб, икки-уч бўлагини бирлаштириб тикиб оламиз.
Бичишда газлама қалин-юпқалигига қараб чок ташланади. Драп, сукно, вилюр каби газламаларда чок ҳақи ) 0,5 см гача, юпқа газламадан (чит,сатин) тикиш учун эса 0,5-1,0 см чок ҳақи қолдирилади. Барча деталлар чизиб олиниб, андозалардаги белги чизиқлар тушуриб олингач, яна бир текшириб чиқилади. Барча жараёнлар тўғри бажарилган бўлса, деталларни эҳтиёткорлик билан қирқиб олинади.
Эслатма: Мўйнани кичик маникюр қайчисида фақатгина газлама асосидан, тукига зарар етказмасдан бичиш қулай; чок ҳақи кўпинча 0,3-0,5см қолдирилади.