Toshkent davlat yuridik universiteti

Toshkent davlat yuridik universitetida kredit-modul tizimida o`quv jarayonini tashkil etish tartibi to`g`risidagi nizom tasdiqlandi. Bu haqda Huquqiy axborot ma`lum qildi.
Nizomga muvofiq, Toshkent davlat yuridik universiteti (TDYuU)da Kredit to`plash va ko`chirishning Evropa modeli joriy etiladi.
O`quv yili uchun ta`lim dasturi bir yoki bir nechta modullardan iborat bo`lib, TDYuU kengashi tomonidan tasdiqlanadi.
O`quv yili davomiyligi ham Kengash tomonidan belgilanadi.
Kredit-modul tizimida 1 kredit o`rtacha 25-30 soatlik o`quv yuklamasiga teng. O`quv yuklamasi bakalavriatda – 40-50% auditoriya soati, 50-60% mustaqil ish soatiga, magistraturada – 30-40% auditoriya soati, 60-70% mustaqil ish soatiga bo`linadi.
Kredit soatlari miqdori va o`quv yuklamasi TDYuU saytiga joylashtiriladi.
Talaba bir semestrda 30 kredit, o`quv yilida esa 60 kredit to`plashi lozim.
Bir fanga ajratilgan auditoriya soatining 25 foizini va undan ortiq soatini sababsiz qoldirgan talaba ushbu fandan chetlashtirilib, yakuniy nazoratga kiritilmaydi hamda mazkur fan bo`yicha kreditni o`zlashtirmagan hisoblanadi.
Yakuniy nazoratga kiritilmagan yoki kirmagan, qoniqarsiz baho olgan talaba akademik qarzdor hisoblanadi.
Akademik qarzdor talabalar ta`til vaqtida yoki keyingi semestrlar mobaynida o`zlashtirilmagan kreditlar miqdoriga mos to`lov-kontrakt miqdoridan kelib chiqqan holda to`lov qilganidan keyin o`zlashtirilmagan fanlarni o`z hisobidan qayta o`qishi mumkin.
Toshkent davlat yuridik universiteti — Oʻzbekistondagi davlat oliy oʻquv yurti va yuridik fan markazlaridan biri.
Universitet Oʻzbekistonning yuridik fanlar va yuridik taʼlim milliy markazlaridan biri sifatida eʼtirof etilgan yetakchi oliy taʼlim muassasasi hisoblanadi. Uning nufuzi, obroʻ-eʼtibori respublikadan tashqarida ham keng tarqalgan. Universitet tarkibiga 16 ta mutaxassislik va 3 ta umumtaʼlim kafedralari, Yurist kadrlar malakasini oshirish markazi, Huquqbuzarliklar profilaktikasi va jamoat xavfsizligi sohasida yuridik kadrlarni tayyorlash va qayta tayyorlash boʻyicha ixtisoslashgan filial hamda akademik litsey kiradi. Universitet, shuningdek, Adliya vazirligining oʻquv muassasalari tizimiga kiritilgan 14 ta yuridik kollej (texnikumlar) faoliyati boʻyicha uslubiy rahbarlik va muvofiqlashtirish ishlarini olib boradi.
Vazirlar Mahkamasining 2021-yil 10 dekabr 746-sonli qarori bilan Toshkent davlat yuridik universitetiga yangi rektor etib, Toshqulov Akbar Joʻraboyevich tayinlandi.
Lavozimiga koʻra, universitet rektori adliya vazirining oʻrinbosariga tenglashtirilgan.
2020/2021-oʻquv yilidan boshlab TDYUda oʻquv jarayoni kredit toʻplash va koʻchirishning Yevropa tizimi — ECTS asosida tashkil qilingan. Huquq davlat taʼlim standarti, oʻquv reja va oʻquv dasturlar (sillabuslar) ECTS tizimi talablaridan kelib chiqqan holda ishlab chiqilgan, zamon talablariga mos yangi fanlar kiritilib, fanlarni oʻqitish soatlarining qayta koʻrib chiqilishi taʼminlangan.
Talabalar tomonidan tanlov fanlarni tanlash imkoniyati yaratilgan, ularning mustaqil oʻzlashtirishi masalasiga alohida eʼtibor qaratilib, oʻquv rejalarida talabalarning mustaqil taʼlim olishiga oʻquv yuklamalarning 60% ajratilishi taʼminlangan.
Fan dasturlari (sillabuslar) xalqaro reytinglarda yuqori 300 talikda boʻlgan oliy taʼlim muassasalari tajribasi asosida 3 ta tilda (oʻzbek, rus, ingliz) tayyorlanib, oʻquv jarayoniga joriy etilgan.
Nomutaxassislik fanlari ulushi 22% dan 10% foizga kamaytirildi.
2020/2021 oʻquv yilida xorijiy tilda oʻqitilayotgan mutaxassislik fanlar soni 35 tani tashkil etdi. Barcha fanlar ingliz tilida dars mashgʻulotlari olib boriladigan 23 ta maxsus akademik guruhlar tashkil etildi.
Bakalavriat taʼlim yoʻnalishlari va magistratura mutaxassisliklari boʻyicha 35 ta mutaxassislik fanlari va 5 ta nomutaxassislik fanlari xorijiy tilda oʻqitilmoqda. Mazkur mutaxassislik fanlar amalda oʻqitilayotgan barcha (104 ta) mutaxassislik fanlarga nisbatan 34 foizini tashkil etadi (2019-yilda 2 ta yoki 6,9% ni tashkil etgan).
Oʻquv jarayonini bevosita amaliyot bilan bogʻlash maqsadida Oliy sud, Bosh prokuratura (Bosh prokuratura Akademiyasida), Ichki ishlar vazirligi (IIV Malaka oshirish institutida) hamda Intellektual mulk agentligida amaliy huquqshunoslik kafedralari tashkil etilgan.
Oʻquv jarayonini tashkil qilishda axborot-kommunikasiya texnologiyalari imkoniyatlaridan foydalanishga alohida eʼtibor qaratilib kelingan. Jumladan, 2020/2021 oʻquv yilidan boshlab MOODLE-obyektga yoʻnaltirilgan dinamik taʼlim muhiti asosida distant.tsul.uz masofaviy taʼlim platformasi ishga tushirilgan.

O‘ZBEKISTON RESPUBLIKASI PREZIDENTINING
QARORI