Toshkent davlat yuridik universiteti fuqarolik huquqi kafedrasi oripov jamshidbek yusubjon o

3.3. Тижорат вакиллиги.

Биринчи навбатда тижорат вакиллигини вужудга келиш асосларини кўриб ўтамиз. ХIХ асрнинг охирларидан бошлаб, Европа давлатларида тадбиркорлар томонидан ўзларининг энг ишончли ходимларига деярли чекланмаган ваколатларнинг берилиши тамойили кузатилган. Бундай хизматчилар прокуристлар ёки бош вакил, деб юритилади.

Тадбиркорнинг бошқа тижорат вакилларидан фарқ қилган ҳолда, прокуристнинг ваколатлари доираси ва мазмуни қонунда белгилаб берилган (Германиянинг Савдо тузуклари, Швейсария, Австрия, Болгариянинг қонунчилик актлари) ва тадбиркорлар томонидан ўзгартирилиши мумкин бўлмаган. Демак, ушбу нормальар императив характерга эга. Тадбиркор ўз аризаси орқали прокуристни Савдо риестрида мажбурий рўйхатдан ўтказиши шарт.
Бош вакилнинг бундай ваколатларга эгалиги унга барча суд ва суддан ташқари ишларда, шартнома ва бошқа муносабатларда тадбиркор томонидан бериладиган ишончномасиз ҳам ҳаракат қилиш имконини беради. Германия ва Швейсария қонунчилигида бундай ваколатлар савдо (тижорат) ваколатлари сифатида баҳоланади. Савдо ваколатлари конькрет турдаги корхона учун амалга ошириладиган юридик ҳаракатларга нисбатан татбиқ этилади (Германия савдо тузуклари 54-модда, Швейсариянинг мажбурий қонуни 462-модда).
Ўзбекистон Республикаси Фуқаролик кодексининг 133-моддасига мувофиқ, тадбиркорлар шартномалар тузаётганида улар номидан доимо ва мустақил суратда вакиллик қилувчи шахс (тижорат вакили) вакилнинг ваколатлари кўрсатилган ёзма шартнома асосида, бундай ваколатлар кўрсатилмаган тақдирда эса ишончнома асосида ҳам иш олиб боради.
Тижорат вакили ўзининг иштирокида тузилган шартномадаги турли тарафларнинг манфаатларини фақат бу тарафларнинг розилиги билан ҳамда қонун ҳужжатларида назарда тутилган бошқа ҳоллардагина айни бир вақтда ифодалаши мумкин.
Агар тарафлар билан тузилган битимда бошқача тартиб назарда тутилган бўлмаса, тижорат вакили келишилган ҳақни ва топшириқни бажариш вақтида қилган чиқимларини тенг улушларда тўлашни шартномадаги тарафлардан талаб қилишга ҳақли.
Тижорат вакили ўзига берилган топшириқни бажариб бўлганидан кейин ҳам савдо битимлари тўғрисида ўзига маълум бўлган маълумотларни сир сақлаши шарт. Тадбиркорлик фаолиятининг айрим соҳаларидаги тижорат вакиллигининг хусусиятлари қонун ҳужжатлари билан белгиланади. Тижорат вакиллиги вакилликнинг махсус тури сифатида эътироф этилади.
Тижорат вакиллигининг тадбиркорлик субъектлари учун қуйидаги афзалликларини кўрсатиб ўтишимиз мумкин:

• 
  Муайян ҳудудда тижорат вакиллиги асосида фаолият олиб бориш тадбиркорлик субектлари учун филиал очишдан кўра, осон ва кам харажатли ҳисобланади;
  
• 
  Тижорат вакили билан шартнома тузишда у томонидан тузиладиган шартномалар сонидан қатъи назар маълум бир қатъий суммада пул тўланишини назарда тутадиган шартнома ҳам тузиш мумкин;
  
• 
  Тижорат вакили ваколат берувчи билан меҳнат муносабатлари асосида боғлиқ бўлмайди;
  
• 
  Тижорат вакили бир вақтнинг ўзида шартномадаги турли тарафларнинг манфаатларини ифодалаши мумкин.
  

Корхона хизматчилари томонидан амалга ошириладиган вакилликни ваколатлар доирасига кўра:

• 
  Чекланган ваколатларга асосланадиган вакиллик;
  
• 
  Чекланмайдиган ваколатларга асосланадиган вакилликка бўлишимиз мумкин. Чунки юқорида таъкидлаб ўтганимиздек, бош вакилда чекланмаган ваколатлар мавжуд бўлади.
  

Тижорат вакиллиги турлари:

• 
  Савдо ташкилотининг хизматчиси томонидан амалга ошириладиган вакиллик;
  
• 
  Савдо агентлари томонидан амалга ошириладиган вакиллик;
  
• 
  Биржадаги вакиллик, агар вакил ваколат берувчининг номидан ҳаракат қилса.
  

Тижорат вакилига тўланадиган ҳақ миқдори тарафларнинг келишувига асосан белгиланади. Вакиллик шартномага асосланган ҳолатларда тўланадиган сумма миқдори кўрсатиб ўтилади.
Тижорат вакиллигини соҳасига қараб ҳам турларга бўлиш мумкин. Масалан:

• 
  Суғурта соҳасидаги вакиллик;
  
• 
  Савдо соҳасидаги вакиллик;
  
• 
  Биржадаги вакиллик;
  
• 
  Қимматли қоғозлар билан боғлиқ вакиллик;
  
• 
  Кўчмас мулк бозоридаги вакиллик.
  

Бугунги кундаги тижорат вакиллиги бўйича ҳал қилиниши лозим бўлган муҳим масалалардан бири – бу борадаги халқаро – ҳуқуқий нормаларни унификатсия қилишдир. Бу борадаги илк қадамлардан бири, 1983 йил 17 февральда қабул қилинган “Халқаро товарлар олди-сотдисида вакиллик тўғрисида”ги Конвенсия бўлиб ҳисобланади.